Nafta Brent kalon 70 dollarë për fuçi teksa rriten frikërat për sulm ndaj Iranit
Çmimet e kontratave futures të naftës Brent u rritën sot, duke arritur nivelin më të lartë në katër muaj, për shkak të shqetësimeve në rritje për një sulm të mundshëm ushtarak amerikan ndaj Iranit, prodhuesit të katërt më të madh të OPEC-ut me një prodhim prej 3.2 milionë fuçi në ditë.
“Shqetësimi i menjëhershëm [i tregut] … është dëmi kolateral që do të shkaktohej nëse Irani do të sulmonte fqinjët e tij ose, ndoshta edhe më domethënëse, nëse do të mbyllte Ngushticën e Hormuzit për 20 milionë fuçi nafte në ditë që kalojnë përmes saj”, i tha agjencisë Reuters analisti i PVM-së, John Evans.
Kontratat futures të naftës Brent u rritën me 1.65 dollarë, ose 2.4 për qind, duke arritur në 70.05 dollarë për fuçi rreth orës 13:08 GMT. Në kulmin brenda ditës, Brent u tregtua deri në 70.35 dollarë për fuçi, niveli më i lartë që nga fundi i shtatorit. Kontrata është në rrugë për t’u rritur me mbi 15 për qind gjatë janarit, rritja mujore më e madhe në katër vitet e fundit.
