Dy vëllezër humbin jetën nga stuhia në Gaza, moti i keq përkeqëson krizën humanitare
Një stuhi e fuqishme rezultoi në vdekjen e dy vëllezërve palestinezë gjatë natës dhe sot herët në Qytetin e Gazës, duke e çuar në katër numrin e viktimave të lidhura me motin e keq në Rripin e Gazës gjatë 24 orëve të fundit, thanë burime mjekësore, transmeton Anadolu.
Stuhia, e shkaktuar nga një sistem presioni i ulët, vazhdoi ta godasë Gazën për ditën e tretë radhazi, duke sjellë reshje të dendura shiu, erëra të forta dhe përmbytje që kanë bërë që qindra mijëra palestinezë të zhvendosur të përballen me kushte të vështira brenda tendave të brishta në gjithë territorin.
Vëllezërit, Khader dhe Khalil Iyhab Hanouna, humbën jetën kur një mur u shemb mbi tendën e tyre nga pesha e reshjeve të dendura në pjesën qendrore të Qytetit të Gazës, thanë burimet për Anadolu.
Vdekjet e tyre pasuan dy viktima të tjera të lidhura me stuhinë brenda të njëjtit interval 24-orësh. Një palestinez humbi jetën pasi shtëpia e tij u shemb në kampin e refugjatëve “Shati” në perëndim të Qytetit të Gazës, ndërsa një vajzë e vogël vdiq nga i ftohti pasi tenda e familjes së saj në Khan Younis, në jug të Gazës, u përmbyt.
Disa palestinezë u lënduan gjithashtu kur një pjesë e një shtëpie të dëmtuar më herët nga sulmet izraelite u shemb në zonën Beit Lahia në veri të Gazës. Disa banorë besohet se vazhdojnë të jenë nën rrënoja.
Në një incident tjetër, Mbrojtja Civile e Gazës tha se disa palestinezë, përfshirë fëmijë, u lënduan kur një tendë me familje të zhvendosura u shemb në zonën al-Mina (Porti) në perëndim të Qytetit të Gazës për shkak të erërave të forta dhe reshjeve të mëdha.
Ujërat e shirave përmbytën mijëra tenda në disa zona të enklavës, duke dëmtuar strehimet dhe shkatërruar sendet e familjeve të zhvendosura, duke e përkeqësuar edhe më shumë situatën mes temperaturave të ulëta.
Mbrojtja Civile tha se ka evakuuar disa familje të zhvendosura pasi dy shtëpi të dëmtuara pjesërisht u shembën në Khan Younis, duke paralajmëruar të mos kërkohet strehim në ndërtesa që rrezikojnë të shemben.
Tri ndërtesa të tjera u shembën në perëndim të Qytetit të Gazës të enjten, teksa reshjet e mëdha dhe përmbytjet vazhduan të godasin territorin.
Sipas Mbrojtjes Civile, rreth 250 mijë familje aktualisht jetojnë në kampe zhvendosjeje në gjithë Rripin e Gazës, shumë prej tyre duke u përballur me të ftohtin dhe përmbytjet brenda tendave të brishta.
Pavarësisht armëpushimit që hyri në fuqi më 10 tetor, kushtet e jetesës në Gaza nuk janë përmirësuar, pasi Izraeli vazhdon të vendosë kufizime të rrepta për hyrjen e kamionëve me ndihma, duke shkelur protokollin humanitar të marrëveshjes.
Izraeli ka vrarë më shumë se 70 mijë persona, kryesisht gra dhe fëmijë, dhe ka plagosur mbi 171 mijë të tjerë në sulmet në Gaza që nga tetori 2023, të cilat kanë vazhduar pavarësisht armëpushimit dy muaj më parë.
