“Superhëna e ftohtë” ngrihet mbi New York, Mexico City dhe Gaza

“Hëna e plotë e ftohtë”, superhëna e fundit e vitit 2025 është ngritur mbrëmë, duke krijuar pamje mahnitëse mbi qiellin në Mexico City, New York si dhe në Rripin e Gazës, raporton Anadolu.

Superhëna është regjistruar duke u ngritur pas ndërtesave “One Vanderbilt” dhe “Empire State” teksa dielli perëndoi në New York City.

Hëna e ftohtë u regjistrua pas monumentit të Engjëllit të Pavarësisë dhe monumentit të Vajzës Amajac në Mexico City.

Kjo pamje u pa edhe në Rripin e Gazës, përkatësisht në lagjen Sheikh Radwan në pjesën lindore të enklavës, e cila është shkatërruar kryesisht nga sulmet izraelite.

Emri “Hëna e ftohtë” vjen nga lidhja e Hënës së plotë të dhjetorit me motin më të ftohtë dhe netët më të gjata të vitit në hemisferën veriore.