Kush ishte Yasser Abu Shabab, lideri i milicisë së mbështetur nga Izraeli, i vrarë në Gaza?

Vrasja e liderit të milicisë në Gaza, Yasser Abu Shabab, e konfirmuar nga grupi i tij “Forcat Popullore” dhe nga mediat izraelite, shënon kapitullin e fundit të një njeriu që u përpoq të paraqitej – me mbështetje izraelite – si një alternativë ndaj Hamasit, por që nga palestinezët shihej gjerësisht si bashkëpunëtor.

Në fillim të të tridhjetave dhe nga fisi beduin Tarabin në jug të Gazës, Abu Shabab ishte pothuajse i panjohur në enklavën palestineze derisa doli në krye të një milicie vitin e kaluar. Fillimisht e quajti veten “Shërbimi Kundër Terrorizmit”, ndërsa nga muaji maj i këtij viti grupi u vetëquajt “Forcat Popullore”, një strukturë e armatosur me të paktën 100 luftëtarë që operonin në zonat e kontrolluara nga Izraeli në Gaza.

Grupi funksiononte diku mes një bande kriminale dhe një force të përfaqësimit izraelit, por e paraqiste veten si një grup nacionalist palestinez i përkushtuar në luftimin e Hamasit.

Ky imazh i shërbente Izraelit, edhe pse qëllimi i tij përfundimtar ndaj këtij grupi nuk ishte i qartë, sidomos pasi u bë e dukshme se “Forcat Popullore” nuk gëzonin aspak mbështetje popullore.

Arsyeja për këtë ishte se, për shumë palestinezë, Abu Shabab ishte thjesht një kriminel – ai ishte burgosur për disa vite nga autoritetet palestineze në Gaza për akuza të lidhura me drogën, përpara se të arratisej në fillim të luftës kundër Gazës.

Aleanca e tij e mëvonshme me Izraelin, në një kohë kur ky i fundit po kryente gjenocid në Gaza dhe kishte vrarë më shumë se 70,120 njerëz, e diskualifikoi menjëherë në sytë e shumicës së palestinezëve – përfshirë edhe fisin e tij, i cili në një deklaratë tha se vrasja e tij përbën “fundin e një kapitulli të errët që nuk përfaqëson historinë e fisit”.

Paqartësi ideologjike

Përcaktimi i ideologjisë së Abu Shabab është i vështirë; shumë vëzhgues thonë se ai udhëhiqej nga etja për pushtet dhe jo nga ndonjë pozicion politik i qëndrueshëm.

Emërtimi fillestar i grupit të tij me gjuhën e “kundër-terrorizmit” është disi ironik, duke pasur parasysh raportet për lidhjet e tij me ISIL-in (ISIS), megjithëse kryesisht në kontekste bashkëpunimi për kontrabandë nga gadishulli Sinai i Egjiptit drejt Gazës dhe jo për ndonjë ideologji të përbashkët.

Ka pasur gjithashtu një mospërputhje të vazhdueshme mes prejardhjes së tij dhe prezencës së tij në mediat sociale, ku ai publikonte postime në anglisht dhe madje edhe një opinion në Wall Street Journal.

Në atë artikull, Abu Shabab pretendonte se “Forcat Popullore” kontrollonin pjesë të mëdha të Rafahut lindor, në jug të Gazës, dhe se ishin “gati të ndërtonin një të ardhme të re”.

“Qëllimi ynë kryesor është të ndajmë palestinezët që nuk kanë lidhje me Hamasin nga zjarri i luftës,” thuhej në artikullin që i atribuohej atij.

Por ndërsa Abu Shabab mundohej të minimizonte lidhjet me Izraelin, kryeministri Benjamin Netanyahu pranoi në qershor se qeveria e tij po përdorte klane të armatosura – të cilat, sipas raportimeve të mediave, ishin pikërisht forcat e Abu Shabab – për të luftuar Hamasin.

Ideja për përdorimin e këtyre forcave, sipas Netanyahut, erdhi si rezultat i këshillave nga zyrtarë të sigurisë, pavarësisht dështimeve të mëparshme në punën me grupe lokale, si Ushtria e Libanit të Jugut.

Grabitja e ndihmave

“Forcat Popullore” janë përpjekur ta paraqesin veten si një grup që ndihmon në shpërndarjen e ndihmave shumë të nevojshme në Gaza, sidomos në qendrat e administruara nga GHF-ja, e mbështetur nga SHBA dhe Izraeli.

Abu Shabab i tha CNN-it se ai drejtonte “një grup qytetarësh nga kjo komunitet që janë vullnetarë për të mbrojtur ndihmat humanitare nga grabitja dhe korrupsioni”, dhe grupi i tij shpërndante foto të shpërndarjes së ndihmave.

Por Abu Shabab dhe “Forcat Popullore” janë akuzuar për grabitjen e autokolonave me ndihma. Një memo e brendshme e Kombeve të Bashkuara, e parë nga Washington Post, e quante atë “aktorin kryesor dhe më me ndikim pas grabitjeve masive sistematike”, ndërsa burime të sigurisë në Gaza kanë konfirmuar për Al Jazeera Arabic se grupi i mbështetur nga Izraeli kishte marrë pjesë në grabitje.

Këto akuza, në një kohë kur Gaza po përjetonte uri ekstreme të shkaktuar nga kufizimet izraelite ndaj ndihmave dhe shkatërrimi i infrastrukturës palestineze, e forcuan perceptimin se Abu Shabab ishte thjesht një vegël e Izraelit.

Prandaj nuk është për t’u habitur që pak palestinezë në Gaza – madje edhe ata kundërshtarë të Hamasit – kanë pikëlluar vrasjen e tij.

Rrethanat e vrasjes së tij mbeten të paqarta – ashtu si origjina dhe roli i tij gjatë luftës.

Por, përfundimisht, ndërsa u bë e qartë se ai nuk kishte mbështetjen apo fuqinë për t’u shndërruar në një alternativë të vërtetë ndaj Hamasit, fati i tij dukej gjithnjë e më shumë i vulosur. /Al Jazeera/