Kryediplomati turk dhe homologu iranian zotohen për bashkëpunim më të ngushtë në tregti, migrim dhe çështje rajonale

Ministri i Jashtëm i Turqisë, Hakan Fidan, theksoi sot nevojën për forcimin e bashkëpunimit mes Turqisë dhe Iranit në tregti, energji dhe sigurinë rajonale gjatë një konference për media në Teheran, raporton Anadolu.

“Tregtia dhe energjia janë prioritetet kryesore dhe pamë sërish sot se ka shumë më tepër për të bërë”, tha Fidan, duke folur përkrah ministrit të Jashtëm iranian, Abbas Araghchi, dhe duke vënë në dukje koordinimin e gjatë mes dy vendeve.

Ai tha se palët ranë dakord të përmirësojnë efikasitetin në kufi, të rrisin numrin e pikave kufitare dhe të zbatojnë projekte në logjistikë dhe transport.

“Vendet tona kanë popullsi të mëdha, marrëdhënie të ngushta dhe tregti të lartë, por tregtia jonë duhet të jetë më efikase”, tha Fidan, në vizitën e tij të katërt në Teheran si ministër i jashtëm.

Zyrtarët diskutuan gjithashtu përpjekjet për të adresuar migracionin e parregullt, veçanërisht nga Afganistani.

“Synojmë ta trajtojmë këtë çështje së bashku me Iranin”, tha Fidan, duke shtuar se nevojitet bashkëpunim konkret në rajon.

Kreu i diplomacisë turke mirëpriti planin e Iranit për të hapur një konsullatë të re në provincën lindore turke të Vanit dhe premtoi të marrë pjesë në ceremoninë e hapjes nëse i pranishëm do të jetë edhe homologu iranian.

Dy ministrat ranë gjithashtu dakord të mbajnë së shpejti takimin e nëntë të Këshillit të Bashkëpunimit të Nivelit të Lartë Turqi-Iran në nivel presidencial.

Sa i përket sigurisë rajonale, Fidan tha se të dy vendet e shohin “Izraelin si kërcënimin më të madh për stabilitetin në Lindjen e Mesme”, duke përmendur shqetësimet mbi Gazën, Libanin, Sirinë dhe politikat ekspansioniste izraelite në përgjithësi.

“Komuniteti ndërkombëtar duhet të përmbushë përgjegjësitë e tij”, tha ai.

Fidan gjithashtu rikonfirmoi mbështetjen e Ankarasë për Teheranin gjatë negociatave bërthamore dhe bëri thirrje për heqjen e sanksioneve “të padrejta”.

“Irani duhet t’i zgjidhë çështjet e tij mbi bazën e së drejtës ndërkombëtare”, tha ai.

Ai po ashtu përsëriti përkushtimin e Turqisë për të mbështetur përpjekjet për paqe mes Rusisë dhe Ukrainës.