Trajneri në Gaza u mëson fëmijëve vetëmbrojtje gjatë rimëkëmbjes nga traumat
“Prioriteti ynë janë vajzat dhe djemtë që jetojnë në çadra. Sportet e vetëmbrojtjes u rrisin njerëzve vetëbesimin.”
Klubi sportiv Mashtel në Gaza, i cili u dëmtua rëndë dhe u dogj gjatë dy viteve të genocidit izraelit, ka nisur sërish aktivitetin, edhe pse me resurse të kufizuara, ai po funksionon me qëllim që t’i ndihmojë fëmijët palestinezë të tejkalojnë pasojat psikologjike të sulmeve.
Ushtria izraelite ka shkatërruar çdo aspekt të jetës në Gaza – nga numri i madh i të vrarëve, deri te shkatërrimi i arsimit dhe zakoneve të përditshme të palestinezëve, që u ndërprenë pas 7 tetorit 2023.
Në sulmet izraelite janë vrarë 894 sportistë palestinezë, ndërsa 292 objekte sportive, stadiume dhe palestra, janë dëmtuar rëndë.
Populli palestinez ka përjetuar trauma të thella nga dyvjeçari i gjenocidit izraelit. Kjo traumë ka lënë jo vetëm një “plagë” në mendje, por edhe një gjendje “mpirjeje dhe moslëvizshmërie” në trup.
Duke njohur rolin e sportit në shërimin e trupit, shpirtit dhe në thyerjen e efekteve traumatike, sportistët kanë ndërmarrë hapa për t’i ndihmuar fëmijët të kapërcejnë ngarkesën e tepruar emocionale të shkaktuar nga lufta dhe të rikthejnë besimin në vete.
Trajnerët kanë filluar t’u mësojnë fëmijëve sporte vetëmbrojtjeje në klubin Mashtel, i cili u shkatërrua dhe u dogj gjatë sulmeve izraelite.
Hasan al-Rai, drejtor i Akademisë së klubit sportiv Mashtel, tha se menjëherë pas shpalljes së armëpushimit kishin shkuar në klub, por e gjetën plotësisht të shkatërruar dhe të djegur.
Ai shpjegoi se dëshirojnë ta ringjallin klubin e mbuluar nga rrënojat përmes një iniciative të quajtur “Po, ne mundemi”. Ata lyen muret e djegura dhe siguruan pajisjet sportive më bazike.
