Pohimi shokues: “Eksplozivët evropianë, te bombat amerikane dhe izraelite mbi Gaza!”

Evropa nuk mund të ketë mjaftueshëm eksplozivë për të mbrojtur veten ose Ukrainën, kryesisht sepse furnizuesi i saj monopol i eksplozivëve është i kontraktuar për të dërguar pjesën më të madhe të prodhimit të saj në Shtetet e Bashkuara, të cilat më pas e eksportojnë atë për përdorim nga Izraeli në Gaza, pretendon një deputet polak.

Maciej Konieczny, një anëtar i partisë së krahut të majtë Razem, tha se kompania polake Nitro-Chem, në pronësi të Grupit Polak të Armatimeve, nuk mund të përballojë kërkesën pjesërisht sepse ka nënshkruar kontrata të njëpasnjëshme për të furnizuar eksplozivë në Shtetet e Bashkuara, ku përdoren në bombat e dërguara në Izrael.

Eksplozivët polakë dyshohet se përdoren nga SHBA-të për të prodhuar lloje të ndryshme municionesh, duke përfshirë bombat fragmentuese MK-84 2,000 paundëshe dhe bombat fragmentuese BLU-109 550 paundëshe, për të cilat Izraeli akuzohet se i ka përdorur në Gaza.

SHBA-të aktualisht nuk kanë fonde për të prodhuar eksplozivë brenda vendit, dhe një mungesë e madhe ka shtyrë qeverinë amerikane të japë leje për të ndërtuar një fabrikë në Kentucky.

“Eksplozivët polakë eksportohen tërësisht jashtë vendit, dhe bombat e bëra prej tyre bien mbi kokat e civilëve të pafajshëm në Gaza dhe Jemen,” tha Konieczny për Guardian.

“Ndërkohë, për shkak të këtij devijimi të prodhimit në fabrikë, Polonia nuk ka mjete të gatshme për të prodhuar municionin e saj të nevojshëm: rezervat tona aktuale të eksplozivëve do të ishin të mjaftueshme për aktivitete të armatosura vetëm për një muaj në rast lufte. As nuk kemi eksplozivë të mjaftueshëm për të furnizuar Ukrainën me predha artilerie.

Një shpjegim i plotë është i nevojshëm nëse Gaza po vihet para mbrojtjes së Evropës dhe nëse kjo është një kërkesë që Amerika po i bën qeverisë polake“, tha ai.

Konieczny e ngriti çështjen në parlamentin polak të premten.

Uzina polake vlerësohet të prodhojë midis 10,000 dhe 12,000 ton eksplozivë në vit. Por rreth gjysma e prodhimit të saj aktual është e destinuar për SHBA-në deri të paktën në vitin 2029.

Një raport i shkruar nga një grup organizatash joqeveritare palestineze pohon se “pa eksplozivë në terren, shkalla dhe intensiteti i paparë i bombardimeve ajrore që vranë dhjetëra mijëra palestinezë dhe shkatërruan kushtet e jetesës në Rripin e Gazës… nuk do të kishte qenë i mundur”.

Organizatat joqeveritare theksojnë se midis tetorit 2023 dhe korrikut 2024, SHBA-të transferuan të paktën 14,000 MK-84 dhe 8,700 MK-82 në Izrael. Në maj 2024, Biden ndaloi dorëzimin e disa bombave më të mëdha, por Donald Trump i hoqi këto kufizime sapo mori detyrën. /tesheshi.com/