16 të vrarë nga sulmi më vdekjeprurës rus në perëndim të Ukrainës
Të paktën 16 persona janë vrarë dhe dhjetëra të tjerë janë plagosur nga një sulm rus me dron dhe raketa në qytetin perëndimor të Ternopilit që goditi dy blloqe apartamentesh, kanë thënë zyrtarët ukrainas.
Midis 64 të plagosurve janë 14 fëmijë, ka thënë policia, në një nga sulmet më vdekjeprurëse ruse në Ukrainën perëndimore që nga fillimi i luftës në shkallë të plotë në shkurt 2022.
Dy rajone të tjera perëndimore janë goditur po ashtu, Lviv dhe Ivano-Frankivsk, dhe një sulm me dron ka shënjestruar tre rrethe të qytetit verior të Kharkivit, duke plagosur më shumë se 30 persona. Fotot e postuara në internet treguan ndërtesa dhe vetura në flakë.
Ndërprerjet e energjisë elektrike kanë prekur një numër rajonesh në të gjithë vendin, ka bërë të ditur ministria e Energjisë e Ukrainës.
Presidenti i Ukrainës, Volodymyr Zelensky, ka thënë se Rusia ka sulmuar me më shumë se 470 dronë dhe 47 raketa, duke lënë “shkatërrim të konsiderueshëm”. Ai ka paralajmëruar se njerëzit mund të kenë mbetur të bllokuar nën rrënojat në Ternopil.
Një video e ndarë nga Zelensky tregoi se një nga dy blloqet e apartamenteve të goditura në Ternopil ishte shembur plotësisht.
Si pasojë e sulmeve në perëndim të Ukrainës, Polonia dhe Rumania kanë ngritur në ajër avionët e tyre luftarakë të mërkurën.
