Italia nis hetime për “turistët e luftës” që paguan për të qëlluar civilë boshnjakë gjatë rrethimit të Sarajevës
Prokurorët italianë kanë hapur një hetim mbi pretendimet se disa shtetas italianë kanë udhëtuar në Bosnjë e Hercegovinë gjatë luftës së viteve 1992–1995 për t’iu bashkuar njësive snajperiste serbe dhe për të qëlluar mbi civilë për “argëtim”, raportuan mediat lokale, transmeton Anadolu.
Hetimi, i nisur nga Prokuroria Publike e Milanos, fokusohet te individë të përshkruar në mediat italiane si “snajperë të fundjavës” – ekstremistë të djathtë që thuhet se paguanin ekuivalentin e 80.000 deri në 100.000 eurove për të marrë pjesë në “ekspeditat e qëllimit” gjatë rrethimit të Sarajevës.
Sipas një raportimi në “La Repubblica”, burrat nuk ishin ushtarë, por “turistë lufte radikalë të ekstremit të djathtë”. Dyshohet se ata largoheshin nga qyteti verilindor italian i Triestes të premteve në mbrëmje, kalonin fundjavën në Sarajevë përkrah forcave serbe dhe ktheheshin në Itali më pas.
Prokurori Alessandro Gobbis ka hapur çështjen mbi akuzat e vrasjes së qëllimshme të rënduar, të kryer me mizori dhe me keqdashje. Hetimi aktualisht synon të dyshuar të paidentifikuar.
Agjencia italiane ANSA raportoi se ankesa që nxiti hetimin u paraqit nga gazetari dhe autori Ezio Gavazzeni. Ai citoi informacione nga një shkëmbim emailesh në nëntor 2024 me një zyrtar të Shërbimit të Sigurisë Ushtarake të Bosnjës, i cili kishte marrë në pyetje një vullnetar serb të kapur.
Gavazzeni tha se të paktën pesë italianë nga Milano, Torino dhe Trieste dyshohen të kenë marrë pjesë dhe se njëri prej tyre dyshohet si një pronar klinike estetike. Pretendimet fokusohen në ngjarjet gjatë rrethimit trevjeçar e gjysmë të Sarajevës, në të cilin forcat serbe rrethuan dhe bombarduan kryeqytetin boshnjak që nga prilli i vitit 1992.
Mbi 11.500 civilë u vranë, përfshirë 1.601 fëmijë ndërsa trashëgimia kulturore e qytetit dhe infrastruktura pësuan dëme të mëdha. Në vitin 2021 imazhe të reja dolën në dritë dhe treguan snajperë serbë që synonin civilët në Sarajevë gjatë luftës së viteve 1992–1995 në Bosnjë e Hercegovinë, duke risjellë kujtime të dhimbshme për boshnjakët.
