PSG në hall nga dëmtimet
PSG nuk do të ketë të disponueshëm për disa javë Ousmane Dembele dhe Achraf Hakimi.
Mbrojtësi i parisienëve do të mungojë për një periudhë mbi 6 javore. Ai pësoi një ndërhyrje të rëndë nga lojtari i Bayern Munich, Luis Diaz, në sfidën e së martës në Ligën e Kampioneve.
Pas testeve mjekësore rezultoi se futbollisti nuk kishte frakturë, por kishte dëmtuar kyçin e këmbës. Rekuperimi varion nga 6 deri në 8 javë.
Hakimi është në garë me kohën pasi duhet të jetë gati për pjesëmarrjen e vendit të tij në Kupa e Kombeve të Afrikës muajin tjetër. Ai është kapiteni i Marokut, që pret turneun këtë vit.
PSG konfirmoi se fituesi i Topit të Artë, Ousmane Dembele, dhe mbrojtësi i majtë, Nuno Mendes, gjithashtu do të mungojnë në javët e ardhshme për shkak të problemeve me dëmtimet.
Problemet e përsëritura me dëmtimet kanë bërë që Dembele të kufizohet në vetëm nëntë paraqitje në të gjitha kompeticionet këtë sezon. Ai ka një shqetësim në pulpë dhe ka nevojë për kohë për t’u rikuperuar.
Mendes, 23 vjeç, luajti gjithë ndeshjen kundër Bayernit, por dëmtoi gjurin. Sulmuesi Desire Doue gjithashtu do të qëndrojë në infermeri për disa javë për shkak të një dëmtimi në kofshë.
