Drejtori i Higjienës Komunale jep dorëheqje, njofton avokati i tij

Drejtori i Ndërmarrjes Publike “Higjiena Komunale”, Sabahudin Rustemi, ka dhënë dorëheqje të parevokueshme nga funksioni i tij, dje gjatë marrjes në pyetje në Gjykatën Penale, ka njoftuar avokati i tij, Asmir Alispahiq.

“Ajo që dua të bëj publike, me kërkesë të drejtorit, është se ai ka paraqitur me procesverbal para gjyqtarit të procedurës paraprake dorëheqjen e tij. Bëhet fjalë për një dorëheqje të parevokueshme nga posti i ushtruesit të detyrës së drejtorit të Ndërmarrjes Publike “Higjiena Komunale”. Ky është një akt moral nga ana e të dyshuarit, tashmë ish-drejtor Rustemi, i cili nuk dëshiron që opinioni publik të mendojë se do të pengojë hetimet në çfarëdo mënyre”, deklaroi mbrëmë avokati Alispahiq.

Ai sqaroi se dorëheqja e Rustemit është dhënë pas konsultimeve me mbrojtësit e tij.

“Ky është një veprim që do të mundësojë zhvillimin e pandërprerë të hetimeve, me qëllim që të dëshmojmë se drejtori nuk ka asnjë lidhje me veprën penale, dhe se as nuk ka ndikuar, as mund të ndikojë, e as do të pengojë hetimin në asnjë formë”, shtoi avokati.

Sipas tij, janë thellësisht të bindur se do të dëshmojnë që ajo për të cilën akuzohen të dy nuk ka asnjë lidhje reale.

“Bëhet fjalë për një vepër penale të rrallë, që rrallëherë haset në sistemin tonë juridik. Fjala është për nenin 230 të Kodit Penal, i cili me ndryshimet e vitit 2023 ka marrë një fushë më të gjerë veprimi”, theksoi Alispahiq.

Ai shtoi se drejtori i akuzuar kishte kërkuar nga Bordi Drejtues dhe ai Mbikëqyrës që të siguroheshin më shumë burime dhe mekanizim, si dhe punësime të reja, por kërkesa e tij nuk ishte miratuar. Rustemi, sipas avokatit, ishte emëruar në detyrë në shkurt të vitit 2025, ndërsa programet dhe rregulloret vjetore të punës ishin miratuar në fund të vitit 2024.

Alispahiq është gjithashtu avokat mbrojtës i menaxherit të mbetjeve në ndërmarrje, Aki Saiti.

Gjykata dje u ka caktuar të dyve paraburgim prej 30 ditësh. Rustemi dhe Saiti akuzohen për “rrezikim të mjedisit jetësor dhe natyrës me mbetje”, vepër e parashikuar në nenin 230, paragrafi 1, të Kodit Penal.