Protestuesit anti-izraelitë nisen drejt kryeqytetit të Pakistanit

Disa mijëra anëtarë të lëvizjes Tehreek-e-Labbaik Pakistan (TLP) kanë nisur marshimin drejt Islamabadit pas përplasjeve të dhunshme me policinë gjatë protestave anti-izraelite në qytetin lindor të Lahores.

TLP e nisi protestën të enjten në Lahore dhe njoftoi planet për të marshuar drejt ambasadës së SHBA-së në Islamabad, për të shprehur kundërshtimin ndaj armëpushimit të ndërmjetësuar nga SHBA mes Izraelit dhe Hamasit, pas dy vitesh lufte në Gaza.

Demonstratat u përshkallëzuan në dhunë të premten, me përplasje mes policisë dhe protestuesve. Trafiku u ndërpre në Lahore dhe në Islamabad, rreth 370 kilometra në veri, ndërsa autoritetet pezulluan lidhjet e internetit mobil dhe mbyllën rrugët kryesore.

Në kryeqytet, kontejnerët e transportit po vendoseshin si barriera përgjatë rrugëve kryesore në pritje të mbërritjes së protestuesve.