Familje të tëra janë goditur nga një sulm vdekjeprurës me dronë, ndërsa Izraeli vazhdon bombardimet intensive mbi qytetin e Gazës
Dy shpërthime të fuqishme tronditën zonën gjatë orës së fundit, të cilat u dëgjuan deri në 15 kilometra larg. Sulmet, sipas dëshmitarëve, ndodhën pa asnjë paralajmërim paraprak.
Bombardimet u regjistruan njëkohësisht në lagjen Tal al-Hawa dhe në pjesën perëndimore e qendrore të qytetit të Gazës – zona të mbipopulluara, ku qëndron shumica e civilëve të mbetur.
Që nga orët e para të mëngjesit, spitali al-Shifa ka pranuar gjithnjë e më shumë të plagosur. Vetëm pak minuta më parë, u konfirmua se një familje që po evakuohej me automjet është goditur nga një raketë droni, ku katër persona humbën jetën në vendngjarje.
Kalimtarët e tjerë u përpoqën të ndihmojnë të mbijetuarit, duke i nxjerrë nga mjeti i përfshirë nga flakët dhe duke i transportuar drejt spitalit.
Ndërkohë, qindra civilë të tjerë vazhdojnë të lëvizin nëpër rrugë, të ndjekur nga dronët dhe avionët luftarakë izraelitë që i detyrojnë të zhvendosen nga një vend në tjetrin.
