Protestuesit izraelitë i bëjnë thirrje SHBA-së të ushtrojë presion mbi Netanyahun për t’i dhënë fund luftës në Gaza

Protestuesit në Izrael po ushtrojnë më shumë presion ndaj qeverisë amerikane për të ndihmuar në përfundimin e luftës në Gaza.

Mijëra demonstrues kanë shpalosur një baner në Tel Aviv, duke i bërë thirrje presidentit amerikan Donald Trump të “bëjë histori” dhe të shtyjë përpara një marrëveshje për lirimin e pengjeve.

Protestat u organizuan nga familjet e pengjeve të mbajtura në Gaza.

Rubi Chen, babai i pengut izraelit Itay, e krahasoi planin e Netanyahut për të pushtuar qytetin e Gazës me planet e ish-presidentit amerikan Richard Nixon për të zgjatur dhe përshkallëzuar luftën në Vietnam në vitet 1960, një vendim që çoi në më shumë humbje jete.

“Mendoj se është një krahasim i drejtë me kryeministrin Netanyahu. Shefi i shtabit të [ushtrisë izraelite] ka deklaruar se Izraeli i ka arritur të gjitha objektivat ushtarake. Tani është koha për t’i konsoliduar arritjet ushtarake me një marrëveshje diplomatike, ku baza e saj është lirimi i 49 pengjeve, një armëpushim i përhershëm, lejimi i ndihmës humanitare në Gaza dhe, shpresoj, ndërtimi i një të ardhmeje më të mirë për të gjithë ne,” tha Chen.

Yair Moses, djali i ish-pengut izraelit Gadi, tha se kishte frikë se ofensiva do të çonte në vdekjen e pengjeve të mbetura.

“Ne kemi shumë frikë nga kjo, sepse kemi frikë se do të shkaktojë vdekjen e shumë pengjeve… që do të humbasim gjurmët edhe të atyre që tashmë janë vrarë,” tha ai. “Jemi shumë të shqetësuar. Duam një marrëveshje që do t’i kthejë të gjithë dhe t’i japë fund luftës… sepse nuk shohim se si kjo do t’i sjellë ata të gjallë në shtëpi. Sigurisht, jo vetëm të gjallët, por edhe të vdekurit… jemi të shqetësuar se nuk do t’i gjejmë kurrë.”