Mexhiti: Çairi do të bëhet qendër e sportit me projekte konkrete

Kandidati i VLEN-it për kryetar të Çairit, Izet Mexhiti, ka theksuar rëndësinë e sportit dhe të rinjve në zhvillimin e komunës, duke prezantuar projekte konkrete për përmirësimin e infrastrukturës sportive.

“Çairi ka traditë të fortë sportive dhe ka nxjerrë sportistë që kanë arritur majat, nga garat kombëtare deri te skenat ndërkombëtare. Ky është dëshmim se potenciali ekziston, por mbetet detyrë e komunës të krijojë kushte më të mira për zhvillimin e sportit dhe të rinjve tanë,” tha Mexhiti.

Ai theksoi se ka zhvilluar bashkëbisedim me sportistët për të dëgjuar sfidat e tyre dhe për të planifikuar hapat e ardhshëm. “Sepse një Çair që investon në sport, investon në identitetin dhe të ardhmen e vet,” u shpreh ai.

Në programin e tij, Mexhiti ka përfshirë disa projekte madhore:

Ndërtimin e sallës multifunksionale “Çair” me 3.000 ulëse dhe standarde për gara ndërkombëtare.

Rikthimin në jetë të sallës “Partizani”, që të bëhet sërish shtëpi e sportistëve tanë.

Ndërtimin e tre fushave multifunksionale në Tophanën e Vjetër, Sahat Kullë dhe Gazi Babë.

“Me projektet që kemi, Çairit do t’i kompletohet pamja e plotë: një qendër universitare, kulturore, arsimore dhe njëkohësisht edhe qendër sportive, ashtu siç e meriton,” tha kandidati i VLEN-it.

Në fund, ai theksoi vendosmërinë e tij:

“Unë do të jem në krah të sportit dhe do të garantoj që Çairi të marrë vendin që i takon në hartën sportive të vendit dhe rajonit. Ne nuk premtojmë. Ne realizojmë. Investojmë për fëmijët. Për klubet sportive. Për shkollat. Për shëndetësinë. Për çdo qytetar. Për Çairin.”