Zv/ministrja Zekolli Shaqiri takimin e parë zyrtar e zhvillon në Kosovë
Zv/ministrja e Transportit dhe Lidhjeve, Kaltrina Zekolli Shaqiri, takimin e parë zyrtar pas marrjes së postit e ka zhvilluar në Republikën e Kosovës.
“Takimin tim të parë jashtë vendit e zhvillova në Republikën e Kosovës, ku takova kolegët Ministrin e Mjedisit, Planifikimit Hapësinor dhe Infrastrukturës të Republikës së Kosovës, Liburn Aliu, dhe Zëvendësministrin Hysen Durmishi”, njofton zv/ministrja Zekolli Shaqiri.
E shoqëruar edhe me deputetin Adnan Azizi, zv/ministrja e Trasportit dhe Lidhjeve ka shtuar se takimi u zhvillua në një atmosferë vëllazërore, duke u përqendruar në bashkëpunimin ndërmjet dy vendeve për projekte infrastrukturore të rëndësishme që do të kenë ndikim pozitiv për qytetarët e të dyja palëve, me theks të veçantë për rrugën Tetovë-Prizren.
“Në qendër të diskutimeve ishte projekti jetik i rrugës Tetovë-Prizren, një projekt strategjik që do të ndihmojë në lidhjen më të mirë të dy shteteve tona dhe do të lehtësojë qarkullimin e qytetarëve dhe mallrave. Ky projekt është thelbësor për zhvillimin ekonomik dhe social të rajonit tonë, dhe jemi të përkushtuar për ta realizuar sa më shpejtë dhe me cilësi të lartë”, thuhet në njoftim.
Përveç rrugës Tetovë-Prizren, gjithashtu është biseduar edhe për vazhdimin e pjesës së mbetur të projektit të rrugës Shkup-Bllacë, një tjetër segment kyç që do të përmirësojë lidhjet infrastrukturore ndërmjet Maqedonisë së Veriut dhe Kosovës.
Gjatë takimit, u trajtuan edhe një sërë projektesh të tjera konkrete që synojnë përmirësimin e infrastrukturës rrugore dhe rritjen e cilësisë së jetës për qytetarët tanë.
“Jemi të angazhuar për të siguruar që këto projekte të realizohen me sukses, duke ndjekur standardet më të larta dhe duke siguruar që përfitimet e tyre të ndihen nga të gjithë qytetarët. Bashkëpunimi ynë me Republikën e Kosovës është një shembull i shkëlqyer i vullnetit të mirë dhe përkushtimit për zhvillimin e përbashkët të rajonit tonë”, thuhet në njoftimin e zv/ministres Kaltrina Zekolli Shaqiri.
