Universitetet në Belgjikë kundërshtojnë qëndrimin e KE-së lidhur me bashkëpunimin akademik me Izraelin
Universitetet flamande të Belgjikës njoftuan sot se kanë paraqitur ankesë kundër Komisionit Evropian për mungesën e udhëzimeve të qarta lidhur me partneritetet kërkimore me institucionet izraelite, transmeton Anadolu.
Ankesa i është dorëzuar Avokatit Evropian të Popullit përmes Këshillit Ndëruniversitar Flamand, i cili përfaqëson universitetet.
Universitetet kërkojnë krijimin e një kornize të përbashkët evropiane që përcakton mënyrën se si merren parasysh detyrimet në fushën e të drejtave të njeriut dhe të së drejtës ndërkombëtare në projektet kërkimore të financuara nga BE-ja, veçanërisht në lidhje me bashkëpunimin me subjektet izraelite.
Ato kërkojnë sqarime nëse universitetet mund të përballen me gjoba financiare ose kërkesa për kompensim në rast se tërhiqen nga partneritetet për shkak të shkeljeve të mundshme të të drejtave të njeriut.
“Që nga maji i vitit 2024, ne i kemi kërkuar vazhdimisht Komisionit Evropian sqarime për këtë çështje. Megjithatë, përgjigjet e KE-së vazhdojnë të kufizohen në referenca të përgjithshme ndaj rregulloreve dhe procedurave ekzistuese, pa ofruar udhëzime, kritere apo arsyetime konkrete”, ka thënë në një deklaratë kryetari i Këshillit, Bernard Vanheusden.
“Si rezultat, universitetet që dëshirojnë të ndërpresin një bashkëpunim për shkak të rrezikut të shkeljeve të të drejtave të njeriut përballen me pasiguri të konsiderueshme ligjore dhe me mundësinë e sanksioneve financiare”, ka shtuar ai.
Që nga tetori i vitit 2023, lufta e Izraelit në Gaza ka vrarë mbi 74 mijë palestinezë dhe ka plagosur mbi 175 mijë të tjerë ndërsa ka shkaktuar shkatërrime të gjera që kanë prekur rreth 90 për qind të infrastrukturës civile të enklavës.
