Ukrainë, 13 të vrarë nga sulmi rus! Autoritetet: Nuk e dimë se çfarë arme përdori Moska, ishte shkatërrimtare
Zyrtarët ukrainas njoftuan së të paktën 13 njerëz janë vrarë dhe dhjetëra të tjerë janë plagosur nga një sulm ajror rus në qytetin jugor Zaporizhja.
Sulmi i së mërkurës u krye në një qark industrial në qytet, tha kryetari i administratës rajonale.
“Nuk ka asgjë më mizore se sulmet ajrore në qytet, duke ditur që qytetarët e thjeshtë do të pësojnë dëmet”, tha presidenti i Ukrainës, Volodymyr Zelensky.
Sipas autoriteteve ukrainase është e paqartë se çfarë arme është përdorur, megjithatë përmasat e dëmeve dhe numri i viktimave lënë të kuptohet se është përdorur një armë e fuqishme.
Sulmet ajrore ishin paralajmëruar përmes sirenave, të cilat vunë alarmin për mundësinë e goditjeve me raketë apo mbase me bombë – por dyshohet se ishte një armë e telekomanduar që hidhet nga ajri dhe që Rusia e ka përdorur me ndikim shkatërrues kundër mbrojtjeve ukrainase.
Më herët, Ukraina pretendoi se e ka goditur një depo nafte brenda territorit rus, e cila shërbente për një bazë ajrore strategjike në rajonin jugor të Saratovit.
