U shkatërrua një kartel i madh i kokainës në Ballkan

Në një aksion të madh policor në Shqipëri është shkatërruar një strukturë kriminale e dyshuar për kontrabandë ndërkombëtare të kokainës, ndërsa mes personave për të cilët janë lëshuar urdhër-arreste ndodhen 10 të dyshuar, përfshirë edhe Sokol Bibajn (43), i cili sipas hetimeve konsiderohet një nga anëtarët kyç të grupit.

Bibaj lidhet edhe me rastin “Dvojnik”, një aferë në të cilën, sipas pretendimeve të hetimeve, janë lëshuar pasaporta maqedonase për persona me të kaluar kriminale nga rajoni dhe më gjerë. Në këtë kontekst, ai në Maqedoni kërkohej për përdorim të një dokumenti të rremë të lëshuar me identitet të vjedhur.

Sipas informacioneve nga mediat shqiptare, grupi kriminal ka vepruar gjatë periudhës 2019–2021, duke krijuar një rrjet të organizuar mirë për transportin e kokainës nga Amerika e Jugut drejt Evropës. Kanalet e kontrabandës zhvilloheshin kryesisht përmes porteve në Belgjikë dhe Holandë, të cilat konsiderohen ndër pikat kryesore hyrëse të drogës në Evropë.

Prokuroria në Shqipëri pretendon se rrjeti ka qenë i përfshirë në organizimin e transportit të të paktën 50 tonëve kokainë, duke e renditur këtë rast ndër më të mëdhenjtë në rajon. Në disa aksione të ndara, shërbimet e sigurisë kanë sekuestruar rreth 9 tonë drogë, përfshirë dërgesa me qindra kilogramë në Antverp dhe disa tonë në Guayaquil të Ekuadorit.

Përveç kontrabandës me narkotikë, hetimi zbulon se grupi është marrë edhe me pastrim parash përmes bizneseve legale dhe investimeve. Në kuadër të operacionit, autoritetet shqiptare kanë ngrirë dhe konfiskuar 491 prona dhe mjete financiare, me një vlerë të përgjithshme të vlerësuar rreth 150 milionë euro.

Mes pasurive të sekuestruara ndodhen vila luksoze, hotele, objekte biznesi, toka bregdetare dhe një numër i madh llogarish bankare.

Në listën e të dyshuarve, përveç Sokol Bibajt, përmenden edhe Nikola Bibaj, Isa Aliu, Florian Musaj, Armando Paçani, Denis Matoshi, Naldi Izeiraj, Oklid Aliu, Dritan Gjika dhe Shpëtim Aliu. Disa prej tyre, sipas pretendimeve, kanë përdorur identitete dhe dokumente të rreme, përfshirë pasaporta maqedonase të lëshuara përmes aferës “Dvojnik”.

Peshë shtesë rastit i japin edhe komunikimet e përgjuara përmes aplikacionit të koduar Sky ECC, ku të dyshuarit thuhet se kanë diskutuar hapur për sasitë e kokainës dhe shpërndarjen e drogës në Evropë. Në një nga mesazhet, sipas mediave shqiptare, përmendet edhe deklarata: “Do ta drogojmë Evropën”, gjë që e rëndon më tej seriozitetin e akuzave.

Operacioni është rezultat i një bashkëpunimi afatgjatë ndërkombëtar mes autoriteteve shqiptare dhe shërbimeve partnere nga Europol, Eurojust, Agjencia Kombëtare Britanike kundër Krimit, si dhe shërbime të sigurisë nga Kolumbia dhe Ekuadori.

Autoritetet shqiptare kanë njoftuar se hetimet vazhdojnë dhe nuk përjashtohen arrestime të reja dhe konfiskime shtesë, ndërsa rasti vlerësohet si një nga goditjet më të mëdha ndaj krimit të organizuar të narkotikëve në rajon.