Sekretari i jashtëm britanik dënon “terrorizmin e tmerrshëm të kolonëve” në Bregun Perëndimor të pushtuar
Sekretari i jashtëm britanik, Ed Miliband, ka dënuar atë që e quajti “terrorizëm të tmerrshëm të kolonëve” kundër palestinezëve në Bregun Perëndimor të pushtuar, duke u zotuar se qeveria nuk do të pajtohet me shkatërrimin e zgjidhjes me dy shtete, transmeton Anadolu.
“Gjatë javëve të fundit kemi parë gjithashtu terrorizëm të tmerrshëm të kolonëve dhe palestinezë të dëbuar nga shtëpitë e tyre”, u tha Miliband ligjvënësve në Dhomën e Komunave.
Duke theksuar se qeveria nuk do të pajtohet me shkatërrimin e zgjidhjes me dy shtete, ai tha se, “Ne do të veprojmë dhe në javët e ardhshme do të paraqes një paketë gjithëpërfshirëse masash”.
Miliband gjithashtu tha se qeveria britanike nuk dëshiron që kompanitë e Mbretërisë së Bashkuar të “financojnë, ndërtojnë apo reklamojnë” vendbanime të reja në Bregun Perëndimor të pushtuar.
Deklaratat e tij vijnë në një kohë kur është shënuar një rritje e ndjeshme e sulmeve nga kolonët e paligjshëm izraelitë në Bregun Perëndimor të pushtuar.
OKB-ja tha në gusht se dhuna nga kolonët izraelitë kishte arritur në “nivele të paprecedentë”, me më shumë se 1.430 sulme që shkaktuan viktima ose dëme materiale të dokumentuara gjatë vitit 2026 deri në fillim të gushtit.
Duke iu përgjigjur një pyetjeje lidhur me “kërcënimet” e fundit ruse për shkak të ndihmës ushtarake të Mbretërisë së Bashkuar për Kievin, Miliband tha se Britania nuk do të “frikësohet nga kërcënimet ruse”.
“Rusia mund të bëjë kërcënimet e saj, por ne nuk do të zmbrapsemi nga solidariteti dhe mbështetja jonë për Ukrainën”, tha ai.
Javën e kaluar, Rusia tha se objektet ushtarake britanike në Ukrainë dhe më gjerë mund të vihen në shënjestër si kundërpërgjigje ndaj përdorimit nga Kievi të raketave britanike për të goditur Rusinë.
Ndërkohë, duke iu referuar njoftimit të agjencisë meteorologjike britanike më herët se vera e vitit 2026, sipas të dhënave paraprake, ishte më e ngrohta e regjistruar ndonjëherë në vend, Miliband tha se ndryshimet klimatike janë “një nga kërcënimet më të mëdha të sigurisë kombëtare me të cilat përballemi”.
