Rusia godet Ukrainën para takimit të Zelenskyy me Trump

Rusia ka nisur sulme me raketa dhe dronë ndaj Kievit dhe rajoneve të tjera ukrainase të shtunën, disa orë para se Presidenti Volodymyr Zelenskyy të takohej me Presidentin amerikan Donald Trump në Florida për të diskutuar një marrëveshje paqeje që do të mund të mbyllte gati katër vite luftë.

Eksplozionet tronditën Kievin ndërsa sistemet ajrore të mbrojtjes u vunë në gatishmëri, ndërsa dronët synuan verilindjen dhe jugun e vendit. Ushtria bëri të ditur përmes aplikacionit Telegram se po përdoren raketa.

Derisa ishte ora 8:00 sipas kohës lokale (06:00 GMT), sulmet vazhdonin, dhe të paktën tetë persona ishin plagosur, njoftuan autoritetet në Kiev.

Alarmet për sulme ajrore mbetën në fuqi, sipas dëshmitarëve të Reuters.

Sulmet detyruan mbylljen e përkohshme të aeroporteve të Rzeszow dhe Lublin në Poloni, ku avionë luftarakë u ngritën në ajër. Rusia nuk ka komentuar menjëherë.

Këto sulme ndodhin ndërsa Zelenskyy përgatitet të negociojë mbi kontrollin territorial — një pikë kyçe kontestuese në konfliktin që nisi me sulmin e Rusisë në Ukrainë në 2022, lufta më vdekjeprurëse në Evropë që nga Lufta e Dytë Botërore.

Marrëveshje paqeje më e gjatë

Raportohet se një draft-plani paqeje me 20 pika, i udhëhequr nga SHBA, është 90 për qind i përfunduar, duke përfshirë garanci sigurie për Kievin, tha Zelenskyy për gazetarët, çka konsiderohet e domosdoshme pas dështimeve të premtimeve të mëparshme.

“Shumë gjëra mund të vendosen para Vitit të Ri,” shkroi Zelenskyy në rrjetet sociale.

Trump tha se Shtetet e Bashkuara janë forca kryesore pas këtij procesi. “Ai nuk ka asgjë derisa unë të aprovoj,” i tha Trump Politico. “Do të shohim çfarë ka.”

Zelenskyy tha se Kievi synon një marrëveshje sigurie më të gjatë dhe ligjërisht të detyrueshme sesa oferta 15-vjeçare e SHBA-së, sipas Axios.

Trump shfaqi optimizëm për takimin e së dielës dhe njoftoi se mund të bisedojë së shpejti me Presidentin rus Vladimir Putin.

Para bisedimeve, një thirrje me Presidenten e Komisionit Evropian Ursula von der Leyen dhe udhëheqës të tjerë është planifikuar për të shtunën.

Komprimis

Mosmarrëveshjet territoriale fokusohen te rajoni lindor Donetsk — që forcat ruse nuk kanë mundur ta pushtojnë — dhe te centrali bërthamor i Zaporizhzhias, më i madhi në Evropë, i marrë nga Moska në fillim të luftës.

Kievi kërkon që luftimet të ndalen në vijat aktuale.

Nën një kompromis amerikan, mund të krijohet një zonë ekonomike e lirë nëse Ukraina dorëzon pjesë të Donetskut, megjithëse detajet mbeten të pazgjidhura.

Zelenskyy sugjeroi se mund të mbajë një referendum mbi planin nëse mbështetja amerikane është e pamjaftueshme, për sa kohë që Rusia pranon një armëpushim 60-ditor, citon Axios presidentin ukrainas.

Zëvendësministri i Jashtëm rus, Sergei Ryabkov, sipas agjencisë Interfax, pranoi dallimet mes qëndrimeve të Kievit dhe Moskës, por përshkroi negociatat si duke arritur një “pikë kthese”.

Zyrtarë të Kremlinit konfirmuan diskutime të vazhdueshme me SHBA-në mbi propozimet e paqes, por nuk zbuluan qëndrimin e Rusisë. /TRT World/