Qindra nxënës izraelitë protestojnë në Tel Aviv duke kërkuar shkëmbim të të burgosurve
Qindra nxënës izraelitë demonstruan në Tel Aviv për të kërkuar një marrëveshje për shkëmbimin e të burgosurve me palestinezët, raporton Anadolu.
Sipas të përditshmes izraelite Haaretz, qindra studentë morën pjesë në një tubim në Tel Aviv për të bërë thirrje për një marrëveshje me të cilën do të garantohej lirimi i robërve izraelitë në Gaza.
Tubimi, të cilit iu bashkuan familjet e pengjeve, ishte pjesë e një nisme mbarëkombëtare që përfshin 200 shkolla që planifikojnë të mbajnë protesta në disa zona anembanë Izraelit.
Zyrtarët izraelitë kanë raportuar përparim në negociatat indirekte për të arritur një marrëveshje armëpushimi në Gaza dhe shkëmbimin e të burgosurve me Hamasin.
Hamasi dje njoftoi se bisedimet e zhvilluara në Katar për të arritur një marrëveshje ishin “pozitive dhe serioze”.
“Arritja e një marrëveshjeje armëpushimi dhe shkëmbimi i të burgosurve është i mundur nëse pushtuesi ndalon vendosjen e kushteve të reja”, tha Hamas në një deklaratë të shkurtër.
Izraeli vlerëson se ka rreth 100 robër izraelitë në Gaza, teksa sipas organizatave palestineze të të burgosurve, Izraeli mban më shumë se 10 mijë palestinezë në burgjet e tij. Hamasi ka thënë se 33 robër janë vrarë nga sulmet ajrore izraelite në Gaza.
Përpjekjet e ndërmjetësimit të udhëhequra nga SHBA, Egjipti dhe Katari për të arritur një armëpushim deri më tani kanë dështuar për shkak të refuzimit të kryeministrit izraelit Benjamin Netanyahu për të ndalur luftën në Gaza.
Izraeli ka vazhduar një luftë gjenocidale në Gaza duke vrarë më shumë se 45 mijë njerëz, shumica prej tyre gra dhe fëmijë, që nga sulmi i Hamasit më 7 tetor 2023.
Muajin e kaluar, Gjykata Ndërkombëtare Penale lëshoi urdharreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli po përballet gjithashtu me padi për gjenocid në Gjykatën Ndërkombëtare të Drejtësisë për veprimet e tij në Gaza.
