Pas marketeve, në Maqedoni zbulohet edhe “karteli” i kompanive të sigurimit

Nga Komisioni për Mbrojtjen e Konkurrencës thonë se pas një hulumtimi intensiv disa mujor, është konstatuar se në Maqedoni ka një të ashtuquajtur “kartel” të ri, këtë radhë te sektori i sigurimeve. Përkatësisht, me kërkesë të Ministrisë së Financave, Komisioni ka iniciuar procedura kundër 10 kompanive të sigurimit në Maqedoni, për shkak të ekzistimit të bazave të dyshimit se kanë bashkuar forcat në një “kartel”, që është drejtpërdrejt në dëm të qytetarëve dhe ekonomisë së Maqedonisë.
“Dhjetë kompanitë e sigurimit që ofrojnë shërbime sigurimesh në territorin e Maqedonisë, në prill të vitit 2024, me sjellje të bashkërenduar, e zëvendësuan gjendjen e konkurrencës së papenguar në tregun përkatës me një gjendje të bashkëpunimit praktik ndërmjet ndërmarrjeve, qëllimi i të cilit është shtrembërimi i konkurrencës, duke rritur çmimin e shitjes së primit/përqindjes për kryerjen e veprimtarisë së sigurimit (kompensimi i parapaguar ndaj palës së tretë për sigurimin e automjetit), regjistrimin e mjeteve motorike”, sqaron KPP.

Komisioni i Mbrojtjes së Konkurrencës, për dokumentimin e plotë të rastit dhe fillimin e procedimeve të duhura kundërvajtëse ndaj autorëve, ka kryer një sërë kontrollesh në zyrat e shoqërive të sigurimit, duke përfshirë kontrollet e komunikimit të tyre të ndërsjellë, gjatë të cilave u konstatua se vendimi për rritjen e çmimit të primit të auto përgjegjësisë është marrë si rezultat i sjelljes së bashkërenduar – CARTEL.