Parlamenti i Libisë miraton unanimisht marrëveshjen e kufirit detar me Turqinë

Dhoma e Përfaqësuesve e Libisë miratoi unanimisht të martën një marrëveshje për kufirin detar me Turqinë, duke anuluar refuzimin e mëparshëm të marrëveshjes dhe një vendim për të ndërprerë lidhjet politike me Ankaranë, sipas një deklarate nga parlamenti libian, transmeton Anadolu.

Në një deklaratë të lëshuar në Bengazi, parlamenti tha se ligjvënësit votuan unanimisht për të miratuar memorandumin e mirëkuptimit të nënshkruar midis Turqisë dhe ish-Qeverisë së Pajtimit Kombëtar të Libisë mbi përcaktimin e zonave të juridiksionit detar në Detin Mesdhe.

Parlamenti gjithashtu shfuqizoi Rezolutën nr. 1 të vitit 2020, i cili refuzonte ratifikimin e dy memorandumeve të mirëkuptimit të nënshkruara midis Libisë dhe Turqisë.

Ligjvënësit gjithashtu votuan unanimisht për të përmbysur Rezolutën nr. 6 të vitit 2020, që bënte thirrje për ndërprerjen e marrëdhënieve politike me Ankaranë, thuhet në deklaratë.

Turqia dhe Libia nënshkruan marrëveshjen për juridiksionin detar në nëntor 2019 për të vendosur kufijtë e zonave të tyre përkatëse detare në Mesdhe.

Vota e së martës shënon një përmbysje të kundërshtimit të mëparshëm të parlamentit libian ndaj marrëveshjeve dhe qëndrimit të tij të mëparshëm mbi marrëdhëniet politike me Turqinë.