Në varrezat e qytetit të Tetovës iu dha lamtumira e fundit këngëtarit Shpat Kasapi

Familjarë, miq e kolegë të mbledhur nga të gjitha viset shqiptare, në pallatin e Kulturës në Tetovë i dhanë lamtumirën e fundit këngëtarit tetovar Shpat Kasapi i cili ndërroi jetë pas një ataku kardiak në moshën 40 vjeçare.

“Sot me zemër të thyer jemi mbledhur këtu për të dhënë lamtumirën e fundit, vëllait tim dhe tuajit, Shpatit. Është shumë e vështirë të gjej fjalët që mund të përshkruajnë dhimbjen që ndjej, sepse kjo humbje nuk është e thjeshtë por është një humbje e një pjese të shpirtit e një zëri të mrekullueshëm që na ka shoqëruar gjithë jetën”, tha Jehona, motra e Shpat Kasapit.

Kolegët që erdhën nga të gjitha viset shqiptare, me lot në sy kujtuan momentet e bukura që kaluan me Shpatin.

“Shpesh ku takoheshim diskutonim për të bë një duet por nuk gjenim kohë ta realizojmë, e di që Shpati tani gjendet në një botë shumë më të mirë se kjo dhe i premtoj që do e bëjmë atë duet në Botën tjetër”, u shpreh Arif Ziberi.

“Kjo sallë ky vend ku jemi sot është vendi ku Shpati la gjurmë. La gjurmë shpirti, këngë dhe dashuri. Ai preku shpirtit e secilit prej nesh, duke na dhënë emocione të forta, ndërsa sot ne tronditemi nga ndarja e tij e hershme nga jeta”, tha Edona Llalloshi.

“Në këtë skenë, pikërisht këtu ku unë dhe Shpati kemi filluar për herë të parë bashkë, sot po këtu në skenë që për ne dy nuk ishte vetëm skenë por vendi ku morëm frymë për herë të parë si fëmijë, si artisë, ku ndamë ëndrrat dhe rritëm talentin shpresat dhe miqësinë tonë”, u shpreh Big Mama.

Kreu i Tetovës Bilall Kasami tha se humbja e hershme e Shpatit, nuk është humbje vetëm për familjarët e miqtë, por për gjithë Tetovën

“Unë vetëm dua të them se ndoshta më shumë vlen thënia që, Perëndia i merr pranë vetes ata që më së shumti i do, për më shumë që ndoshta kjo botë e padrejtë nuk e meritonte Shpatin dhe Zoti e mori më herët nga se e pritëm”, theksoi Bilall Kasami, Kryetar i Tetovës.

Pas mbledhjes komemorative në Shtëpinë e kulturës, familjarët shokët miqtë dhe gjithë ata që e njohën, përcollën atë për në banesën e tij të fundit në varrezat e Tetovës./Alsat.mk