Ministri ukrainas, Umerov: Çështjet kryesore Ukrainë-Rusi mund të zgjidhen vetëm në nivel udhëheqësish

Ministri ukrainas i Mbrojtjes, Rustem Umerov deklaroi se ata janë të gatshëm të përqendrohen në kategori të caktuara për lirimin e të burgosurve me Rusinë dhe se çështjet kryesore midis dy vendeve mund të zgjidhen vetëm në nivel udhëheqësish, raporton Anadolu.

Anëtarët e delegacionit përfaqësues të Ukrainës folën në një konferencë për media pas takimit trepalësh Turqi-Rusi-Ukrainë të organizuar nga Turqia në Stamboll. Umerov tha se ata kanë ndarë punimet e kryera mbi memorandumin për çështjen e zgjidhjes me Rusinë disa ditë më parë, por se ende nuk kanë marrë përgjigje nga Moska.

Ai theksoi se gjatë bisedimeve të sotme, delegacioni rus i paraqiti Ukrainës një dokument në lidhje me vendosjen e një armëpushimi, se u duhet një javë për të shqyrtuar dokumentin dhe se do të koordinojnë hapat e mëtejshëm dhe se kanë kërkuar lirimin e të gjithë të burgosurve dhe fëmijëve ukrainas.

Pasi theksoi se ata janë të gatshëm të përqendrohen në kategori të caktuara në lidhje me lirimin e të burgosurve, Umerov tha: “Ne po vlerësojmë të burgosurit e luftës të plagosur rëndë dhe që janë të sëmurë. Kategoria e dytë janë ushtarët e rinj midis moshës 18-25 vjeç. Qëllimi ynë këtu është të gjithë në këmbim të të gjithëve. Në këtë kontekst, kthimi i 6 mijë ushtarëve është gjithashtu në axhendë”.

Umerov tha se ata kanë paraqitur një listë prej disa qindra fëmijësh ukrainas në Rusi dhe se kjo çështje është një përparësi jashtëzakonisht e rëndësishme për Ukrainën. “Nëse Rusia është vërtet e përkushtuar ndaj këtij procesi paqeje, kthimi i të paktën gjysmës së këtyre fëmijëve do të shihet si një tregues pozitiv”, tha ministri ukrainas.

– “Pikat kyçe mund të zgjidhen vetëm në nivelin e udhëheqësve”

Umerov tha se një temë tjetër në axhendë ishte një takim që mund të mbahet midis udhëheqësve të dy vendeve. “Ne besojmë se të gjitha pikat kyçe mund të zgjidhen vetëm në nivelin e udhëheqësve”, shtoi ai.

Duke vënë në dukje se edhe udhëheqës të tjerë si presidenti i SHBA-së, Donald Trump mund të marrin pjesë në takimin që mund të mbahet midis udhëheqësve, Umerov theksoi se puna shtesë që duhet bërë midis delegacioneve do të ishte kuptimplotë nëse do të jetë në natyrën e përgatitjes për takimin e udhëheqësve.

Ministri ukrainas tha se ata i kanë propozuar palës ruse të mbajë një takim më 20-30 qershor. “Kjo është e rëndësishme në mënyrë që negociatat të vazhdojnë dhe të përparojnë. Ne i kemi thënë Rusisë prej shumë kohësh se kjo luftë duhet të përfundojë dhe e gjithë bota na mbështet në këtë kuptim. Ne mendojmë se duhet të bëhet punë e vërtetë për t’i dhënë fund luftës këtu dhe ne bëjmë thirrje për këtë”, tha Umerov.

Sipas tij, hapi i parë është një armëpushim shumë i qartë, hedhja e hapave humanitarë dhe përgatitjet për samitin e udhëheqësve. “Nëse Rusia është serioze për t’i dhënë fund luftës, ajo duhet të përparojë përmes këtyre pikave. Nëse jo, duhet të pasojnë sanksionet ndërkombëtare”, shtoi Umerov.

Zëvendësministri i Punëve të Jashtme të Ukrainës, Sergiy Kyslytsya tha se “Ne i kemi sjellë bisedimet tona (Rusi-Ukrainë) në një pikë ku mund të arrijmë disa rezultate konkrete humanitare”. Kyslytsya tha se ata kanë marrë udhëzime nga presidenti ukrainas Volodymyr Zelenskyy për të vazhduar konsultimet konstruktive në Stamboll dhe se ata kanë ndarë pikëpamjet e tyre me palën ruse.

Ai tha se kërkuan përgjigje nga Rusia për propozimet që paraqitën në formë të shkruar. “Ne ende nuk kemi marrë përgjigje nga Federata Ruse në këtë kontekst. Ne nuk i kemi parë propozimet e Federatës Ruse, sepse ato na u paraqitën në takim. Prandaj, nuk bëhet fjalë që ne të reagojmë ndaj tyre”, potencoi Kyslytsya.

“Pala ruse tha se ne duhet t’i vlerësojnë këto propozime dhe e sugjeroi këtë. Megjithatë, ne i kemi sjellë bisedimet tona për këtë çështje në një pikë ku mund të arrijmë disa rezultate konkrete humanitare. Presidenti i SHBA-së, Donald Trump i kishte ofruar më parë armëpushim pa kushte dhe se ata ia kishin përcjellë të njëjtën ofertë edhe palës tjetër. Pala ruse e hodhi poshtë idenë e një armëpushimi pa kushte”, tha ai.

“Delegacioni rus në takimin e mëparshëm e ka hedhur poshtë mundësinë e pranisë së një delegacioni amerikan. Kjo në fakt është një situatë shumë e trishtueshme. Sepse SHBA-ja ka rol shumë të rëndësishëm. SHBA-ja është një ofrues i rëndësishëm i sigurisë”, nënvizoi Kyslytsya.

Ai tha se nuk është e mundur të flitet për siguri afatgjate në Evropë nëse partnerët amerikanë dhe evropianë nuk janë të përfshirë në proces. Kyslytsya vuri në dukje se një palë me kapacitet për të monitoruar një armëpushim të mundshëm ose një marrëveshje paqeje është e nevojshme dhe se SHBA-ja është aktor i përshtatshëm për këtë rol.

Zëvendësdrejtori i Drejtorisë Kryesore të Inteligjencës (GUR) të Ministrisë së Mbrojtjes së Ukrainës, Vadym Skibitsky tha se “Herën e fundit, ne sqaruam disa çështje në lidhje me shkëmbimet e të burgosurve. Deri tani, kemi bërë përparim të ri dhe kjo është formula ‘të gjithë në këmbim të të gjithëve'”. Ai më tej tha se kanë përcaktuar kategoritë e personave që do të lirohen dhe afate të caktuara në lidhje me shkëmbimin e të burgosurve.

Skibitskyi tërhoqi vëmendjen për faktin se duhet bërë një punë shumë e vështirë në lidhje me shkëmbimin e të burgosurve, se personat duhet të konfirmohen dhe se ata vazhdojnë përpjekjet e tyre për të mos humbur askënd.