Ministri izraelit kërcënon Egjiptin me humbjen e Sinait në rast sulmi, thirrje për aneksimin e territoreve libaneze

Ministri izraelit i Financave, Bezalel Smotrich, i cilësuar si ekstremist, tha se nuk u beson garancive të presidentit egjiptian Abdel Fattah al-Sisi se Egjipti nuk ka ndërmend ta sulmojë Izraelin, duke paralajmëruar se Egjipti mund ta humbasë Gadishullin e Sinait nëse ndërmerr një sulm, transmeton Anadolu.

Duke folur të hënën për platformën izraelite Ali Express, Smotrich vuri në pikëpyetje mënyrën se si Izraeli mund të garantojë që Egjipti nuk do ta sulmojë.

“Nëse ata e kuptojnë se herën tjetër që do të sulmojnë, nuk do të ketë më Sinai, kjo është garancia”, tha ai.

Smotrich, i cili drejton Partinë e Sionizmit Fetar të ekstremit të djathtë, iu referua deklaratave të fundit të Sisit se Egjipti nuk ka pretendime territoriale dhe as synime për të zhvilluar luftë kundër Izraelit.

“Një nga mësimet e 7 tetorit është se duhet të përgatitemi jo për synimet e armiqve tanë, por për aftësitë e tyre, dhe Egjipti ka aftësi të tilla”, shtoi ai.

Më 5 tetor, Smotrich pretendoi në mënyrë të ngjashme se frika e Egjiptit nga humbja e Sinait po e pengonte atë të sulmonte Izraelin.

Duke iu përgjigjur këtyre deklaratave të mërkurën e kaluar, gjatë një ceremonie me rastin e 53-vjetorit të luftës arabo-izraelite të vitit 1973, Sisi theksoi se Egjipti nuk ka pretendime territoriale ndaj asnjë vendi.

Ai tha se Egjipti kishte luftuar në vitin 1973 për të mbrojtur territorin e tij dhe përfundimisht kishte rimarrë të gjithë Gadishullin e Sinait, të cilin Izraeli e kishte pushtuar në vitin 1967.

Sisi rikonfirmoi gjithashtu se traktati i paqes i vitit 1979 mbetet kuadri që rregullon marrëdhëniet mes Egjiptit dhe Izraelit.

– Aneksimi i territoreve libaneze
Smotrich bëri gjithashtu thirrje që Izraeli të aneksojë zonat në Libanin jugor që aktualisht janë nën pushtimin e ushtrisë izraelite.

“Duhet ta aneksojmë territorin të paktën deri te vijat ku jemi pozicionuar sot”, tha ai.

Ai paralajmëroi më tej se forcat izraelite do të përparonin drejt Bejrutit në përgjigje të çdo sulmi nga Hezbollahu.

Që nga 2 marsi, sulmet izraelite ndaj Libanit kanë vrarë më shumë se 4.300 persona, kanë plagosur mbi 12.400 të tjerë dhe kanë zhvendosur më shumë se 1 milion njerëz, sipas të dhënave libaneze.

– Zhvendosja e palestinezëve
Smotrich bëri gjithashtu thirrje që Izraeli të marrë kontrollin e Rripit të Gazës dhe të nxisë largimin e rreth 2,4 milionë banorëve palestinezë të enklavës.

“Duhet t’ua zhdukim shpresat për të qëndruar”, tha ai, duke mbështetur marrjen nën kontroll të enklavës nga Izraeli, ruajtjen e Gazës në gjendjen e saj të shkatërruar dhe nxitjen graduale të largimit të banorëve.

Smotrich sugjeroi që nisma për zhvendosjen të paraqitej ndërkombëtarisht si zgjidhje për çështjen e refugjatëve, në vend që të përshkruhej si nxitje e migrimit.

“Nuk dua ta quaj nxitje të migrimit. Në arenën ndërkombëtare, do të ishte më mirë ta quanim zgjidhjen përfundimtare të çështjes së refugjatëve dhe rehabilitimin e tyre”, tha ai.