Mexhiti: Bulevardi “Cvetan Dimov” po kalon nga premtimi në realizim
Komuna e Çairit ka ndërmarrë hapat e parë konkretë për realizimin e projektit për zgjerimin e Bulevardit “Cvetan Dimov”. Ekipet e komunës, së bashku me ekspertë gjeodezikë, kanë dalë në terren për përcaktimin e saktë të trasesë së bulevardit.
Kryetari i Komunës së Çairit, Izet Mexhiti, përmes një komunikate ka bërë të ditur se projekti synon të përmirësojë qarkullimin dhe lidhjen e Çairit me Butelin, Shutkën dhe komunat përreth, përcjell zhurnal.mk.
“Sot hodhëm një hap konkret drejt realizimit të Bulevardit ‘Cvetan Dimov’”, ka deklaruar Mexhiti, duke e cilësuar projektin jo vetëm si një ndërhyrje infrastrukturore, por edhe si përmbushje të një premtimi dhe të një nevoje të kahmotshme të qytetarëve.
Sipas tij, reagimet e qytetarëve gjatë punës në terren kanë qenë jashtëzakonisht pozitive. Mexhiti thekson se zgjerimi i bulevardit përfaqëson një ndërhyrje të nevojshme që pritet të ndikojë në lehtësimin e qarkullimit dhe përmirësimin e lidhjeve infrastrukturore në këtë pjesë të qytetit.
“Premtimet kanë vlerë vetëm kur shndërrohen në punë konkrete. Bulevardi ‘Cvetan Dimov’ po kalon nga premtimi në realizim”, ka shkruar Mexhiti.
Projekti për zgjerimin e Bulevardit “Cvetan Dimov” synon të përmirësojë qarkullimin dhe lidhjet rrugore mes Çairit, Butelit, Shutkës dhe zonave përreth.
