Kryeministri i Malit të Zi, Spajiq, thotë se vendi i tij është më afër anëtarësimit në BE

Bashkimi Evropian (BE) dhe Mali i Zi në mars në Bruksel do të definojnë mekanizma të rinj për të forcuar rezistencën ndaj kërcënimeve të sigurisë dhe ndikimit keqdashës, tha kryeministri malazez Milojko Spajiq në një mesazh të publikuar në platformën X me bazë në SHBA, transmeton Anadolu.

Spajiq deklaroi se e kishte diskutuar këtë me Përfaqësuesen e Lartë të BE-së për Punë të Jashtme dhe Politikë të Sigurisë, Kaja Kallas, duke theksuar se Mali i Zi po ndërmerr “hapa konkretë” me mbështetjen e Ekipit të Reagimit të Shpejtë të BE-së.

Deklaratat e tij u bënë në margjinat e takimeve të mbajtura së bashku me Këshillin e Punëve të Jashtme të BE-së (KPA), ku ministrat e jashtëm të Bosnjë e Hercegovinës, Malit të Zi, Serbisë, Maqedonisë së Veriut, Shqipërisë dhe Kosovës po takohen me zyrtarë të lartë të Bashkimit Evropian, përfshirë Kallasin.

Spajiq përsëriti se Mali i Zi është më afër anëtarësimit në BE, duke shtuar se ky status është rezultat i shumë viteve pune dhe përafrimit të vazhdueshëm me politikat evropiane, veçanërisht në fushën e politikës së jashtme dhe të sigurisë.

“Mali i Zi po kontribuon fuqishëm në qëllimet e Bashkimit Evropian dhe si i tillë është me meritë në ballë të procesit të zgjerimit”, tha Spajiq.