Kolonët ilegalë hebrenj marrin nën kontroll Xhaminë historike Ibrahimi në Hebron

Autoritetet izraelite ia kanë hequr kompetencat administrative Komunës palestineze të Hebronit mbi Xhaminë Ibrahimi dhe ia kanë transferuar ato një këshilli fetar të kolonëve hebrenj, sipas një raporti të publikuar të martën nga gazeta Israel Hayom.

Duke e përshkruar këtë veprim si një “ndryshim historik dhe i paprecedent”, gazeta thotë se e ashtuquajtura administratë civile izraelite ka caktuar si autoritet mbi këtë vend të shenjtë këshillin fetar të vendbanimit Kiryat Arba, ngjitur me Hebronin në Bregun Perëndimor të pushtuar.

Raporti nuk saktëson shtrirjen e kompetencave të transferuara, por thotë se lëvizja synon të mundësojë “ndryshime strukturore” në vend.

E vendosur në qytetin e vjetër të Hebronit, i cili është nën pushtim izraelit, Xhamia Ibrahimi është e rrethuar nga rreth 400 vendbanues ilegalë izraelitë që mbrohen nga rreth 1,500 ushtarë izraelitë.

Kompleksi i xhamisë besohet nga fetë abrahamike se mban eshtrat e Profetit Ibrahim dhe familjes së tij.

Sulm terrorist sionist

Më 25 shkurt 1994, që përkonte edhe me ditën e 15-të të Ramazanit, terroristi sionist Baruch Goldstein kreu një masakër në Xhaminë Ibrahimi.

Goldstein hyri në xhami dhe hapi zjarr mbi besimtarët myslimanë që po falnin me një armë automatike, duke vrarë 29 persona dhe plagosur rreth 150 të tjerë.

Më vonë po atë ditë, gjatë dhe pas varrimeve të viktimave, pati përleshje të dhunshme mes demonstruesve palestinezë dhe forcave pushtuese, ku u vranë edhe më shumë palestinezë, sipas Institutit për Studime Palestineze.

Komisioni Shamgar

Pas masakrës së vitit 1994, Izraeli e ndau xhaminë, duke alokuar 63 përqind të saj për adhurim hebre dhe 37 përqind për myslimanët.

Dhoma e lutjeve për hebrenjtë ndodhet në seksionin mysliman të xhamisë.

Ky përfaqëson ndryshimin e parë të madh në statusin e xhamisë që nga rekomandimet e vitit 1994 nga Komisioni Shamgar, që ndau aksesin mbi të.

Sipas Israel Hayom, administrata civile izraelite ka kërkuar prej kohësh të zbatojë ndryshime strukturore në këtë vend, përfshirë renovimin e çatisë dhe ndërtimin mbi “Oborrin e Jakobit”, që përdoret nga adhuruesit hebrenj gjatë shumicës së vitit.

Nuk ka pasur ende konfirmim zyrtar nga autoritetet izraelite apo përgjigje nga qeveria palestineze lidhur me raportin.

Shkeljet e mëparshme

Në një deklaratë të lëshuar më 26 shkurt, Ministria palestineze e Vakëfeve dhe Çështjeve Fetare përsëriti se Xhamia Ibrahimi, e njohur gjithashtu si Shpella e Patriarkëve apo Shpella e Makpelës, është “vakëf islamik ekskluziv” dhe dënoi përpjekjet izraelite për ta shndërruar xhaminë në sinagogë hebraike.

Në mars, ministria palestineze deklaroi se Izraeli ka refuzuar ta hapë plotësisht Xhaminë Ibrahimi për besimtarët myslimanë siç është zakon gjatë të premteve në muajin e shenjtë të Ramazanit.

Në deklaratë, ministria e quajti këtë veprim “hap të paprecedent dhe të rrezikshëm, si në aspektin e shkallës, ashtu edhe të kohës, gjatë muajit të bekuar të Ramazanit, dhe pjesë të një plani sistematik për të penguar hapjen e plotë të sallave, oborreve dhe korridoreve të xhamisë për myslimanët.”

Ministria theksoi se dorëzimi i xhamisë për adhurim mysliman gjatë natës së së premtes në Ramazan ka qenë praktikë e rregullt çdo vit, si përgatitje për hapjen e saj të plotë për besimtarët.

Ajo gjithashtu paralajmëroi se “heshtja përballë kësaj situate nënkupton institucionalizimin e këtij realiteti të ri, duke penguar çdo herë hapjen e zonave të reja dhe duke hapur rrugën që Izraeli ta marrë plotësisht nën kontroll Xhaminë Ibrahimi.”

Në përfundim, ministria theksoi se kjo shkelje e vazhdueshme bëhet për t’i shërbyer kërkesave të vendbanuesve ilegalë hebrenj, të cilët kundërshtojnë hapjen e plotë të xhamisë për besimtarët myslimanë. /TRT World/