“Ishte një mekanizëm ndërhyrjeje”, Rusia mirëpret mbylljen e USAID-it
Rusia ka shprehur kënaqësinë e saj me vendimin e administratës së re amerikane për mbylljen e Agjencisë Amerikane për Zhvillim Ndërkombëtar (USAID), të cilën Moska e konsideron si një “makinë ndërhyrjeje” në punët e shteteve.
“E vetmja gjë me të cilën jemi të kënaqur është se gjithçka që thamë u vërtetua,” tha zëdhënësja diplomatike ruse Maria Zakharova, duke iu referuar kritikave të shumta të vendit të saj ndaj shërbimit.
Rusia e dëboi USAID-in nga territori i saj në vitin 2012, duke e akuzuar atë për financimin e protestave të opozitës kundër Kremlinit dhe ndërhyrjen në zgjedhje.
Ajo gjithashtu e akuzon atë për mbështetjen e lëvizjeve anti-qeveritare në shtetet fqinje, kryesisht në Ukrainë dhe Gjeorgji, me qëllim që të shkaktojë rënien e autoriteteve qeveritare dhe ardhjen në pushtet të individëve më miqësorë me Uashingtonin dhe më armiqësor ndaj Rusisë.
“Është një makinë për ndërhyrje në punët e brendshme, një mekanizëm për ndryshimin e regjimeve, rendit politik, strukturën e shtetit,” tha Zakharova.
Agjencia amerikane njoftoi të mërkurën se i gjithë personeli i saj (përfshirë ata jashtë vendit) do të vendoset në leje administrative duke filluar nga e premtja.
Pas kësaj, agjencia amerikane u vu nën përgjegjësinë e Sekretarit të Shtetit të SHBA, Marco Rubio.
USAID u krijua në vitin 1961 me një akt të Kongresit Amerikan. Ajo menaxhon një buxhet prej mbi 40 miliardë dollarësh, të destinuar për ndihmë humanitare dhe ndihmë zhvillimore në mbarë botën. Ajo punëson afërsisht 10,000 njerëz, dy të tretat e të cilëve shërbejnë jashtë vendit.
