Houthi pretendon se “shënjestroi” aeroplanmbajtësen amerikane ‘Harry S. Truman’ në Detin e Kuq
Grupi Houthi i Jemenit ka bërë të ditur se kreu një operacion ushtarak që shënjestroi aeroplanmbajtësen ‘Harry S. Truman’ dhe anije të tjera luftarake armiqësore në Detin e Kuq, transmeton Anadolu.
Zëdhënësi i grupit Houthi, Yahya Sare’e, tha në një deklaratë televizive se Forcat Ajrore dhe Forcat Detare të grupit kryen një operacion të përbashkët duke përdorur raketa lundrimi, raketa balistike dhe dronë në përgjigje të “agresionit të vazhdueshëm amerikan” kundër Jemenit.
Ai shtoi se operacioni gjithashtu shënjestroi “anije luftarake të tjera armiqësore” që operonin në zonë.
“Si rezultat i përplasjes dhe konfrontimit, aeroplanmbajtësja u detyrua të tërhiqet dhe të largohet nga pozicioni i saj i mëparshëm, duke u drejtuar drejt pjesës më veriore të Detit të Kuq”, tha zëdhënësi i grupit.
Ai shtoi se forcat jemenase “do të vazhdojnë të shënjestrojnë dhe ndjekin aeroplanmbajtësen dhe të gjitha anijet luftarake armiqësore në Detin e Kuq dhe Detin Arabik derisa të ndalet agresioni kundër Jemenit”.
Sot, njoftoi grupi Houthi, të paktën 68 persona u vranë dhe 47 të tjerë u plagosën në sulmet ajrore amerikane në një strehë për emigrantët afrikanë në provincën veriore Saada të Jemenit.
Më vonë, Marina e SHBA-së tha se një avion luftarak amerikan F-18 dhe një mjet rimorkimi nga aeroplanmbajtësja ‘Harry S. Truman’ u rrëzuan derisa operonin në Detin e Kuq, ndërsa F-18 ishte “nën tërheqje aktive në hangarin kur ekuipazhi i lëvizjes humbi kontrollin e avionit”.
SHBA-ja ka kryer më shumë se 1.200 sulme ajrore në Jemen që nga 15 marsi, sipas të dhënave të grupit Houthi që përjashtojnë humbjet midis forcave të tyre, sulme në të cilat janë vrarë mbi 225 civilë dhe janë plagosur mbi 430 të tjerë, kryesisht gra dhe fëmijë.
Muajin e kaluar, presidenti i SHBA-së, Donald Trump, tha se ka urdhëruar “veprime ushtarake vendimtare dhe të fuqishme” kundër grupit Houthi dhe më vonë kërcënoi se do t’i “shkatërrojë plotësisht ata”.
Grupi Houthi ka shënjestruar anijet që kalojnë nëpër Detin e Kuq, Detin Arabik, ngushticën Bab al-Mandab dhe Gjirin e Adenit që nga nëntori i vitit 2023 në solidaritet me palestinezët në Rripin e Gazës, ku të paktën 52 mijë palestinezë janë vrarë në sulmet brutale izraelite për më shumë se 19 muaj.
Grupi jemenas ndaloi sulmet kur u shpall një armëpushim në Gaza në muajin janar midis Izraelit dhe Hamasit, por i rifilloi sulmet pasi Izraeli rifilloi ofensivën ushtarake ajrore në Gaza muajin e kaluar.
