Gaza, Mbrojtja Civile njofton se mes viktimave ka shtatë fëmijë dhe dy gra, të cilat u sulmuan pa paralajmërim pasi kishin kaluar “vijën e verdhë”
Mbrojtja Civile palestineze në Gaza njoftoi të premten vonë se në një sulm ajror izraelit janë vrarë 11 anëtarë të një familjeje, pasi automjeti i tyre u godit pa paralajmërim në lagjen lindore Zeitoun të qytetit të Gazës.
Zëdhënësi i Mbrojtjes Civile, Mahmoud Basal, tha se automjeti ku ndodheshin 11 anëtarë të familjes Shaaban, përfshirë shtatë fëmijë dhe dy gra, u godit menjëherë pasi kishte kaluar “vijën e verdhë”.
Ai theksoi se sulmi ndodhi pa asnjë paralajmërim.
“Ishte e mundur t’u jepej paralajmërim ose të merrej një masë që nuk do të çonte në vdekje,” tha Basal.
“Por, ajo që ndodhi tregon se okupatori mbetet i etur për gjak dhe i vendosur të kryejë krime kundër civilëve të pafajshëm,” shtoi ai.
“Vija e verdhë” është një vijë jozyrtare ndarëse që kufizon zonat ku janë të stacionuara forcat izraelite nga ato ku palestinezëve u lejohet të lëvizin brenda Rripit të Gazës.
Marrëveshja për armëpushim midis Hamasit dhe Izraelit, e arritur përmes ndërmjetësimit rajonal dhe ndërkombëtar dhe e zbatuar më 10 tetor, parashikon tërheqjen e pjesshme të Izraelit nga disa zona të Gazës në pozicione të reja brenda enklavës, të njohura si “vija e verdhë”.
Që nga tetori i vitit 2023, në sulmet izraelite në Gaza janë vrarë pothuajse 68.000 palestinezë, shumica gra dhe fëmijë, ndërsa Gaza është bërë pothuajse e pabanueshme.
