Dogana konfiskon 84.000 euro në vendkalimin kufitar Tabanoc

Doganierët kanë konfiskuar gjithsej 84.000 euro në vendkalimin kufitar Tabanoc, pasi një udhëtar tentoi t’i nxjerrë ato jashtë shtetit.

Inspektorët doganorë nga ekipet mobile të Sektorit për Kontroll dhe Hetime në Tabanoc, gjatë ditës së djeshme konfiskuan valutë të huaj që një shtetas serb kishte për qëllim ta nxirrte ilegalisht nga vendi.

“Për shkak të dyshimeve në deklaratën e udhëtarit se nuk kishte asgjë për të deklaruar dhe se me vete mbante më pak se 1.000 euro, inspektorët doganorë kryen një kontroll të detajuar të automjetit. Gjatë kontrollit, në sediljen e bashkëudhëtarit, nën një xhaketë mashkullore, në një çantë të vogël të zezë, u gjetën 44.000 euro. Ndërsa në bagazhin e automjetit, në një çantë lëkure të zezë, u gjetën edhe 50.000 euro të tjera – gjithsej 94.000 euro, për të cilat personi nuk posedonte dokument për origjinën e parave dhe nuk i kishte deklaruar”, informojnë nga Drejtoria e Doganave.

Sipas njoftimit, personit i janë kthyer 10.000 euro, shumë të cilën, sipas Ligjit për Punë Devizore, personat jorezidentë mund ta nxjerrin nga shteti pa e deklaruar, ndërsa shuma e mbetur prej 84.000 eurosh është konfiskuar përkohësisht.