Luftime ndërkufitare mes Tajlandës dhe Kamboxhias, të paktën 13 të vrarë

Të paktën tetë civilë në Kamboxhia dhe pesë ushtarë janë vrarë në luftimet ndërkufitare me Tajlandën.

Zëdhënësja e Ministrisë së Mbrojtjes së Kamboxhias, Maly Socheata, në një konferencë për media në Phnom Penh tha se gjithashtu 21 anëtarë të Forcave të Armatosura Mbretërore të Kamboxhias (RCAF) dhe të paktën 50 civilë u plagosën gjatë zjarrit të rëndë të artilerisë ndërkufitare, që filloi të enjten.

Një total prej 35.829 civilësh kamboxhianë janë zhvendosur nga zonat me rrezik të lartë në provincat Preah Vihear, Oddar Meanchey dhe Pursat.

Tajlanda ka raportuar 15 viktima, përfshirë një ushtar, si pasojë e përleshjeve, të cilat thuhet se vazhduan për të tretën ditë radhazi. Mijëra tajlandezë gjithashtu janë zhvendosur për shkak të përleshjeve.

Tajlanda vendosi avionë luftarakë derisa Kamboxhia lëshoi raketa në përleshje, me të dyja vendet që akuzojnë njëra-tjetrën për nisjen e të shtënave.

Fqinjët e Azisë Juglindore kanë një mosmarrëveshje kufitare përgjatë provincës Preah Vihear të Kamboxhias dhe provincës verilindore Ubon Ratchathani në Tajlandë, e cila ka ripërtërirë tensionet që nga 28 maji kur u vra një ushtar kamboxhian.