Presidenti amerikan i zhgënjyer nga telefonata me Putinin
Presidenti i SHBA-së, Donald Trump, është shprehur “i zhgënjyer” pas një telefonate me homologun e tij rus, Vladimir Putin, në fillim të kësaj jave, transmeton Anadolu.
“Jam shumë i zhgënjyer me bisedën që pata (të enjten) me presidentin Putin, sepse nuk mendoj se ai është aty”, u tha Trump gazetarëve të premten, pasi u kthye në Washington nga Iowa, ku mori pjesë në një aktivitet para Ditës së Pavarësisë, raporton “New York Post”.
Trump shtoi se nuk ka prova të shfaqura nga Putini për dëshirën për të ndaluar luftën trevjeçare me Ukrainën.
“Nuk mendoj se ai po kërkon të ndalet, dhe kjo është shumë keq”, tha ai më tej.
Duke fajësuar ish-administratën e Joe Bidenit për luftën Rusi-Ukrainë, Trump tha: “Më lanë të bllokuar në mes të saj, ashtu si edhe me imigracionin dhe shumë gjëra të tjera që ata i prishën”.
“Por nuk isha i kënaqur me bisedën”, përsëriti ai.
Më parë, Trump tha se nuk kishte bërë asnjë përparim drejt një armëpushimi në Ukrainë gjatë një telefonate të enjten me Putinin.
“Patëm një telefonatë. Ishte një telefonatë mjaft e gjatë. Folëm për shumë gjëra, përfshirë Iranin, dhe folëm gjithashtu, siç e dini, për luftën me Ukrainën. Nuk jam i kënaqur për këtë”, tha Trump.
“Jo, nuk kam bërë asnjë përparim me të sot”, shtoi ai.
