Të paktën 7 palestinezë të vrarë në sulmet izraelite në Gaza mëngjesin e sotëm
Të paktën 7 palestinezë u vranë dhe disa të tjerë u plagosën sot pasi avionët luftarakë dhe artileria izraelite goditën vende të shumta në të gjithë Rripin e Gazës, përfshirë zonat që strehonin familjet e zhvendosura, raporton Anadolu.
Ushtria izraelite ka përshkallëzuar sulmet ajrore dhe bombardimet me artileri në pjesët jugore dhe lindore të Qytetit të Gazës, veçanërisht në lagjet Zeitoun, Shejaiya dhe Al-Tuffah.
Ushtria kreu sulme ajrore në katër shkolla që strehonin palestinezë të zhvendosur pasi lëshoi paralajmërime për evakuim tre prej tyre në lagjen Zeitoun dhe një në lagjen Al-Tuffah në lindje të Qytetit të Gazës, sipas burimeve lokale.
Pesë trupa u sollën në kompleksin mjekësor “Al-Shifa” pas një sulmi me dron që synonte një grup civilësh në kampin e refugjatëve Al-Shati, në perëndim të qytetit të Gazës, tha një burim mjekësor për Anadolu.
Një tjetër palestinez u vra dhe 23 të tjerë u plagosën pasi u shënjestruan nga ushtria izraelite ndërsa kërkonin ndihmë në rrugën Salah al-Din, në jug të zonës Wadi Gaza, thuhet në deklaratën e spitalit “Al-Awda” në Gazën qendrore.
Forcat izraelite vranë një palestinez dhe plagosën të tjerë në bombardime që synonin tendat në zonën Al-Mawasi në perëndim të Khan Younis në Rripin jugor të Gazës, sipas burimeve mjekësore.
Pavarësisht thirrjeve ndërkombëtare për armëpushim, ushtria izraelite ka vrarë më shumë se 56 mijë palestinezë në një sulm vdekjeprurës në Rripin e Gazës që nga tetori i vitit 2023.
Nëntorin e kaluar, Gjykata Ndërkombëtare Penale (GJNP) lëshoi urdhër-arreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë (GJNP) për luftën e tij në enklavë.
