Mickoski: Po shtohen presionet nga ana bullgare kundër miratimit të raportit të Vajcit

Kryeministri Hristijan Mickoski tha sot se ai do të ishte njeriu më i lumtur nëse më 24 qershor miratohet raporti i raportuesit të Parlamentit Evropian, Tomas Vajc për Maqedoninë, por theksoi se këto ditë ka marrë informacione për shtimin e presioneve politike të ashpra nga eurodeputetët bullgarë dhe qeveria bullgare. Sipas tyre, nëse ky raport miratohet, kjo mund të radikalizojë strukturat proruse kundër qeverisë aktuale proevropiane të Bullgarisë.

Mickoski këtë e theksoi duke u përgjigjur në pyetjen e gazetarëve pas hapjes së kompleksit “Fshati maqedonas” (Makedonsko sello), për pritjet e 24 qershorit për të cilin është shtyrë votimi për Raportin e Propozimit për vendin tonë në Komitetin për Punë të Jashtme të Parlamentit Evropian (AFET).

“Unë do të isha njeriu më i lumtur nëse ky raport votohet në Komisionin për Punë të Jashtme të Parlamentit Evropian (AFET), e më pas të shkojë në seancë plenare të PE-së. Këto ditë po marr informacione për presione të ashpra politike nga eurodeputetët bullgarë dhe nga qeveria bullgare, të cilët pretendojnë se nëse ky raport votohet, kjo mund të radikalizojë rrymat proruse kundër qeverisë aktuale proevropiane në Bullgari. Kjo mjafton për t’ju dhënë një përgjigje se në çfarë gjendje është një vend anëtar i BE-së dhe kush në të vërtetë e pengon procesin e integrimit evropian – për të cilin nga opozitarja LSDM apo nga opozita në përgjithësi janë të gatshëm verbërisht vetëm të firmosin. Imagjinoni nëse do të ishim politikanë kaq të pamatur dhe naivë – ku do të ishte fundi? Por ne do të luftojmë, do të vazhdojmë të luftojmë dhe një pjesë e anëtarëve të AFET-it dhe eurodeputetëve na japin mbështetje të madhe”, theksoi Mickoski.

Kryeministri shtoi se për ne është e mjaftueshme që më në fund ka dalë në sipërfaqe strategjia e vërtetë bullgare.

Me propozim të raportuesit Tomas Vajc, AFET më 4 qershor e shtyu votimin për miratimin e Raportit të propozimit për vendin tonë për datën 24 qershor, me arsyetimin se ishte dëshmitar i debateve intensive politike rreth raportit, por theksoi se qëndron plotësisht pas dokumentit, në përgatitjen e të cilit, gjatë negociatave dhe kompromiseve, siç tha, “kanë marrë pjesë të gjitha grupet parlamentare të Parlamentit Evropian”.

“Ky është një raport i Parlamentit Evropian dhe i Bashkimit Evropian. Ky raport nuk ka qëllim dhe nuk synon të zgjidhë çështje dypalëshe ndërmjet Bullgarisë dhe Maqedonisë së Veriut. Megjithatë e dimë që bëhet fjalë edhe për marrëdhënie dypalëshe, por gjithashtu, le të themi, për sundimin e ligjit, trajtimin e komuniteteve pakicë dhe ashtu me radhë. Prandaj, do doja të kërkoja shtyrjen e votimit për këtë raport deri më 24 qershor”, tha Vajc javën e kaluar.

Në lidhje me mundësinë e një takimi ndërmjet presidentes Gordana Siljanovska-Davkova dhe kryeministrit bullgar Rosen Zheljazkov në margjinat e Samitit të NATO-s javën e ardhshme, Mickoski deklaroi se nëse ekziston një iniciativë e tillë, sigurisht që duhet ta pranojmë, por ajo duhet të vijë nga ai që e propozoi vetë takimin në nivel të lartë, pra nga kryetari i Këshillit Evropian, Antonio Koshta.

Mickoski, siç informoi javën e kaluar, nuk do të marrë pjesë në Samitin e NATO-s në Hagë, atje do të udhëtojë presidentja Siljanovska-Davkova, ndërsa siç u njoftua nga Sofja, në vend të presidentit të tyre, Rumen Radev në Samit do të marrë pjesë kryeministri Rosen Zheljazkov.