Frikë për rritjen e çmimit të naftës pas sulmeve mbi cisternat në Detin e Kuq
Sulmet ndaj anijeve tregtare në Detin e Kuq rrezikojnë të rrisin çmimin e naftës dhe mallrave të tjera, po paralajmërojnë analistët.
Disa firma i kanë ndaluar dërgesat përmes kësaj linje pasi anijet u sulmuan nga rebelët Houthi në Jemen.
Linja e dytë më e madhe e anijeve në botë, Maersk, ka thënë se do t’i nisë disa nga anijet e saj rreth Kepit të Shpresës së Mirë.
Ndërprerja ka bërë që SHBA të nisë një operacion detar ndërkombëtar për të mbrojtur anijet në rrugën e Detit të Kuq.
Vendet që i bashkohen grupit të sigurisë përfshijnë Britaninë e Madhe, Kanadanë, Francën, Bahreinin, Norvegjinë dhe Spanjën.
Sekretari amerikan i Mbrojtjes Lloyd Austin tha: “Përshkallëzimi i fundit i sulmeve të pamatura Houthi me origjinë nga Jemeni kërcënon rrjedhën e lirë të tregtisë, rrezikon marinarët e pafajshëm dhe shkel ligjin ndërkombëtar”.
Deti i Kuq është një nga rrugët më të rëndësishme në botë për dërgesat e naftës dhe gazit natyror të lëngshëm, si dhe për mallrat e konsumit.
Gjigandi i naftës BP tha të hënën se do të ndalonte përkohësisht të gjitha dërgesat e naftës së papërpunuar përmes rrugës kryesore tregtare. Gjiganti rival i energjisë Shell ende nuk ka komentuar mbi situatën.
Marco Forgiona, drejtori i përgjithshëm në Institutin e Eksportit dhe Tregtisë Ndërkombëtare, i tha programit të BBC-së Today se rruga tjetër rreth Kepit të Shpresës së Mirë mund t’i vonojë anijet me rreth dy javë.
Krahas zgjatjes së kohës, shtohet edhe kostot për karburantin dhe sigurimin, “dhe më pas ju keni problemin që anijet janë në vendin e gabuar, kontejnerët janë në vendin e gabuar dhe keni potencialin për bllokim në porte dhe vonesat e mëtejshme”, tha ai.
S&P Global Market Intelligence tha se gati 15% e mallrave të importuara në Evropë, Lindjen e Mesme dhe Afrikën e Veriut u dërguan nga Azia dhe Gjiri përmes detit. Kjo përfshin 21.5% të naftës së rafinuar dhe më shumë se 13% të naftës së papërpunuar.
Një rritje e çmimeve të naftës mund të çojë në inflacion më të lartë, i cili mat ritmin e rritjes së çmimeve. Inflacioni ka rënë në Mbretërinë e Bashkuar dhe aktualisht është 4.6%.
Shifrat e reja të dhëna të mërkurën do të tregojnë nëse ka vazhduar të bjerë, por, në nivelin aktual, është akoma më shumë se dyfishi i objektivit të Bankës së Anglisë prej 2%. Banka deri në muajt e fundit ka rritur normat e interesit për të ulur inflacionin.
Për momentin, ndryshimet në çmimin e naftës kanë qenë minimale. Çmimet u rritën me 1% të hënën, por të martën ato u ndryshuan pak me tregtimin standard të naftës së papërpunuar Brent me rreth 78 dollarë për fuçi.
Megjithatë, Richard Meade, kryeredaktor i gazetës së transportit Lloyd’s List, tha: “Ajo që do të jetë shumë interesante është nëse cisternat vazhdojnë rrugën e ri dhe padyshim që dje u pa që BP do të fillojë t’i nisë disa nga anijet e veta rreth Kepit të Shpresës së Mirë.
“Ky është një treg shumë më i ekuilibruar që mund të japë implikime serioze për zinxhirin global të furnizimit.”
Rebelët Houthi kanë deklaruar mbështetjen e tyre për Hamasin dhe kanë thënë se ata kanë në shënjestër anijet që shkojnë në Izrael, duke përdorur drone dhe raketa kundër anijeve në pronësi të huaj.
