S’ka më kohë shtesë, UEFA mendon ndryshime të reja në Champions League

Pas vetëm një viti nga prezantimi i formatit të ri të Ligës së Kampionëve, UEFA mund të sjellë sërish ndryshime të rëndësishme në këtë kompeticion prestigjioz. Sipas asaj që raporton e përditshmja gjermane SportBild, disa risi të mundshme janë në fazë shqyrtimi dhe pritet të diskutohen më 30 maj nga Komiteti i Garave të Klubeve, pikërisht në prag të finales që do të luhet në Mynih. Nëse miratohen, këto ndryshime do t’i paraqiten për miratim Komitetit Ekzekutiv të UEFA-s.

Ndryshimet kryesore që po merren në konsideratë përfshijnë:
🔹 Eliminimi i kohës shtesë – Në rast barazimi në ndeshjet me eliminim direkt, mund të hiqet koha shtesë prej 30 minutash. Në vend të saj, fituesi do të përcaktohet menjëherë përmes gjuajtjeve të penalltive. Qëllimi kryesor është lehtësimi i ngarkesës fizike të lojtarëve, një shqetësim i ngritur shpesh në sezonet e fundit.

🔹 Përparësi për tetë ekipet më të mira – Klubet që renditen ndër tetë më të mirat në fazën e parë të kompeticionit do të kenë përparësi për të zhvilluar në shtëpi ndeshjet e kthimit në çerekfinale dhe gjysmëfinale. Aktualisht, kjo përparësi aplikohet vetëm në raundin e 1/16-ave.

🔹 Ndalimi i përballjeve mes klubeve nga i njëjti vend para çerekfinaleve – Një tjetër ndryshim i mundshëm është rikthimi i rregullit që ndalon ndeshjet mes ekipeve nga i njëjti shtet deri në fazën çerekfinale. Kjo praktikë ka qenë në fuqi më parë, por u hoq në vitet e fundit.