Michel: Izraeli ka të drejtë të ekzistojë, por duhet të ketë gjithashtu një Autoritet Palestinez të besueshëm

Konflikti dramatik në Lindjen e Mesme, i cili shkakton shumë vuajtje, shkakton polarizimin e shoqërive evropiane, ndaj BE-ja duhet të angazhohet dhe të përfshihet në tejkalimin e tij sa më shumë që të jetë e mundur, tha presidenti i Këshillit Evropian pas Samitit të Bashkimit Evropian në Bruksel.

“Ka unitet të fortë në BE për garantimin e sigurisë së Izraelit. Izraeli ka të drejtën e sigurisë dhe të drejtën për të ekzistuar. Kjo është arsyeja pse ne vazhdojmë të dënojmë sulmet terroriste të Hamasit dhe përdorimin e civilëve si mburoja njerëzore. Ne kërkojmë dhe i bëjmë thirrje Hamasit që menjëherë të lirojë pengjet e mbetura pa kushte dhe konfirmojmë të drejtën e Izraelit për t’u mbrojtur sipas ligjit ndërkombëtar”, tha Michel në një konferencë të përbashkët për shtyp me presidentin e Komisionit Evropian dhe kryeministrin spanjoll Pedro Sanchez.

Ai theksoi se liderët diskutuan idetë e shpalljes së një pauze humanitare në konfliktin ndërmjet Izraelit dhe Hamasit ose armëpushimit, por theksoi se çështja kryesore mbetet tek dërgimi i ndihmave humanitare në Gaza dhe se në këtë kontekst ata diskutuan propozimin e Qipros për të krijuar një korridor humanitar detar.

“Çfarë duhet të mendojmë pas përfundimit të luftës? Si do të qeveriset Gaza? Kjo është arsyeja pse BE-ja, me partnerët e saj, duhet të ofrojë ndihmë operacionale për të forcuar autoritetet palestineze, në mënyrë që ato të jenë një autoritet legjitim dhe i besueshëm, jo ​​vetëm administrativ, por edhe politik”,  shtoi Michel.

Nga ana tjetër, Von der Leyen tha se të dyja palët e përfshira në konflikt duhet të bëjnë çmos për të mbrojtur jetën e civilëve.Alfax.