Franca dhe Belgjika “të shqetësuara” për numrin e madh të viktimave në sulmet izraelite në Gaza

Franca dhe Belgjika shprehën shqetësimet e tyre për numrin e madh të viktimave në enklavën e rrethuar palestineze të Rripit të Gazës për shkak të sulmeve izraelite, raporton Anadolu.

“Jemi të shqetësuar për mënyrën se si kryhen operacionet ushtarake nga Izraeli në Gaza, me një numër shumë të lartë viktimash dhe jemi gjithashtu shumë të shqetësuar për situatën humanitare që bëhet shumë kritike”, tha ministrja e Jashtme franceze, Catherine Colonna në hyrje të Këshillit të Punëve të Jashtme të BE-së në Bruksel.

Ajo theksoi nevojën për “ndërprerje afatgjate dhe të qëndrueshme të luftimeve që do të çonte në armëpushim”. Colonna shprehu gjithashtu shqetësim për sulmet e kolonëve izraelitë ndaj palestinezëve në Bregun Perëndimor të pushtuar.

Izraeli nisi sulme të pamëshirshme ajrore dhe tokësore në Rripin e Gazës pas një sulmi ndërkufitar nga grupi palestinez Hamas më 7 tetor. Izraeli rifilloi ofensivën e saj ushtarake në Rripin e Gazës më 1 dhjetor pas përfundimit të pauzës humanitare njëjavore me grupin palestinez Hamas.

Në sulmet e pamëshirshme izraelite janë vrarë afër 18 mijë palestinezë, kryesisht fëmijë dhe gra ndërsa më shumë se 49.200 të tjerë janë plagosur në enklavën e rrethuar që nga 7 tetori.

– Belgjika bën thirrje për “armëpushim humanitar”

Ministrja e Jashtme e Belgjikës, Hadja Lahbib gjithashtu foli për situatën e paqëndrueshme humanitare në Gaza. “Ne vazhdojmë të lutemi për ndalimin e menjëhershëm të armiqësive që do të mundësonte armëpushim humanitar për të cilin, shpresojmë, se do të çonte në rinisjen e negociatave të paqes”, tha ajo.

Lahbib theksoi nevojën për “korridore humanitare” për të lejuar dërgimin e ndihmave në Gaza dhe shtoi se dhuna po rritet në Bregun Perëndimor, ku shifra mesatare e sulmeve të kolonëve ekstremistë ndaj palestinezëve u rrit nga tre në shtatë në ditë.

“Belgjika vendosi të marrë masa dhe të ndalojë hyrjen e kolonëve të dhunshëm në territorin e saj”, tha Lahbib duke shtuar se ajo do të vazhdojë përpjekjet për të ndaluar hyrjen e tyre edhe në zonën Shengen.

Sulmet e kolonëve izraelitë kundër palestinezëve në Bregun Perëndimor të pushtuar janë rritur në nivelin më të lartë që nga përshkallëzimi i konfliktit izraelito-palestinez më 7 tetor.

Ekstremistët mes kolonëve kanë kryer mbi 300 sulme të dhunshme, duke vrarë të paktën nëntë palestinezë në dy muajt e fundit, sipas autoriteteve shëndetësore, gjithashtu qindra palestinezë u zhvendosën me forcë nga tokat e tyre.