Antonio Guterres thirrje Iranit dhe Izraelit: Rajoni e bota nuk mund të përballojnë më shumë luftë

Gjatë mbledhjes së Këshillit të Sigurimit të dielën, shefi i Kombeve të Bashkuara, Antonio Guterres, paralajmëroi se rajoni i Lindjes së Mesme, po përballet me kërcënimin real të një konflikti në shkallë të gjerë.

Në këtë mbledhje, në të cilën Izraeli dhe Irani akuzuan njëri-tjetrin se po kërcënojnë paqen në Lindjen e Mesme dhe se secili prej tyre, i bëri thirrje këtij institucioni që të vendosë sanksione ndaj palës tjetër.
“Lindja e Mesme është në prag. Populli i rajonit po përballet me kërcënimin real të një konflikti shkatërrues në shkallë të plotë. Tani është koha që të shtensionohet situata”, tha Guterres në mbledhjen e thirrur pas sulmeve me raketa dhe dronë që kreu Irani ndaj Izraelit.

Guterres bëri thirrje për përmbajte, duke theksuar se “as rajoni, e as bota, nuk mund të përballojë më shumë luftë”.

Por, Izraeli dhe Irani akuzuan njëri-tjetrin për destabilizimin e situatës në rajon.