VLEN: KUSH E KEQPËRDORI BALANSERIN?

Koalicioni i partive shqiptare opozitare “VLEN” ka reaguar lidhur me deklaratat e zëvendësministrit plotësues në Ministrinë e Shoqërisë Informatike dhe Administratë, Stefan Andonovski, i cili ka thënë se i ashtuquajturi balanser që përdoret për punësim duhet të ndërpritet dhe se pikërisht kjo mënyrë e punësimit ka bërë që nga Maqedonia të largohen kuadrot më kualitative, raporton Alfax.

“Andonovski, para se të bëj deklarata të tilla aluduese midis rreshtave, është dashur të tregojë se në cilën kohë u jetësua balanseri dhe kush në fakt e keqpërdori më së shumti. Nuk paraqet asnjë problem nëse ndonjë “shqiptar” është punësuar në Berovë apo Pehçevë, por punësimi në institucione shtetërore të qindra e qindra maqedonasve, duke u deklaruar si shqiptarë. Dhe pikërisht kjo ka bërë që kuadrot kualitative shqiptare sot t’i kemi të shpërndarë gjithandej nëpër Evropë, por edhe më larg në Amerikë, Azi e Australi. Më së paku faj për balanserin kanë shqiptarët, vendet e të cilëve, u uzurpuan nga “shqiptarët” maqedonas. Ndaj Andonovski, duke qenë në pozitën aktuale, është mirë që të bëjë një verifikim real dhe do ta shohë se si do t’i dalë rezultati”, kanë shkruar nga VLEN.

VLEN  thotë se është për çdo reformë institucionale në të mirë të të drejtave të të gjithëve, por është kundër atyre lëvizjeve që dëmtojnë shqiptarët, në funksion marketingu parazgjedhor.Alfax.