141.891 persona me diabet në Maqedoninë e Veriut, mbi 6.600 raste të reja në vitin 2025
Në Maqedoninë e Veriut janë regjistruar gjithsej 141.891 persona me diabet, ndërsa vetëm gjatë vitit 2025 janë evidentuar 6.614 raste të reja, tregojnë të dhënat e Regjistrit Kombëtar të Institutit të Shëndetit Publik.
Të dhënat janë publikuar me rastin e 14 nëntorit, Ditës Botërore të Diabetit, e cila këtë vit shënohet me moton “Veprim i hershëm kundër diabetit”.
Nga numri i përgjithshëm i pacientëve të regjistruar, 78.663 janë gra dhe 63.228 janë burra.
Më i përhapuri është diabeti i tipit 2, me 134.918 pacientë të regjistruar, që përbëjnë 95,09 për qind të të gjitha rasteve të evidentuara.
Organizata Botërore e Shëndetësisë paralajmëron se më shumë se 40 për qind e personave me diabet në botë nuk janë në dijeni se vuajnë nga kjo sëmundje.
Veçanërisht shqetësues është fakti se diabeti i tipit 2 mund të zhvillohet gradualisht, pa simptoma të theksuara.
Ndër shenjat më të zakonshme paralajmëruese janë etja e shtuar, urinimi i shpeshtë, lodhja e vazhdueshme, shikimi i turbullt dhe humbja e pavullnetshme e peshës trupore.
Nëse nuk zbulohet dhe kontrollohet me kohë, diabeti mund të shkaktojë komplikime serioze shëndetësore, përfshirë dëmtimin e veshkave, shikimit, nervave dhe enëve të gjakut, si dhe rritjen e rrezikut për sulm në zemër dhe goditje në tru.
Instituti i Shëndetit Publik rekomandon kontrolle të rregullta parandaluese, veçanërisht për personat mbi 45 vjeç dhe qytetarët që kanë rrezik të shtuar.
Ushqyerja e shëndetshme, aktiviteti fizik, ruajtja e një peshe të përshtatshme trupore dhe shmangia e duhanpirjes mund të ndihmojnë ndjeshëm në parandalimin ose shtyrjen e shfaqjes së diabetit të tipit 2.
Diagnostikimi në kohë, terapia e përshtatshme dhe kontrollet e rregullta janë thelbësore për parandalimin e komplikimeve të rënda dhe për përmirësimin e cilësisë së jetës.
