VLEN propozon transformimin e kontratave të përkohshme në punësim të përhershëm
Në konferencën për shtyp, përfaqësuesit e VLEN-it theksuan se nisma synon zgjidhjen e statusit të mijëra punonjësve që prej vitesh punojnë me kontrata të përkohshme dhe pa siguri të qëndrueshme për vendet e tyre të punës.
“Për shumë vite, njerëzit kanë punuar me kontrata të përkohshme dhe në pasiguri të vazhdueshme. Ata i kanë kryer detyrat e tyre çdo ditë, kanë kontribuar në funksionimin e institucioneve, por statusi i tyre i punës ka mbetur i pazgjidhur”, u tha në konferencë.
Propozimi përfshin kategori të ndryshme të angazhimit, përfshirë kontratat me afat të caktuar, kontratat në vepër, kontratat autoriale, angazhimet përmes agjencive dhe forma të tjera kontraktuale për kryerjen e punës.
Sipas VLEN-it, projektligji parasheh edhe mbrojtjen e punonjësve nga ndërprerja e kontratave gjatë zhvillimit të procedurës së transformimit, përveç rasteve të shkeljes së detyrimeve kontraktuale.
Gjatë konferencës u theksua se punësimi dhe paga nuk duhet të përdoren si mjete për ndikim politik.
“Vendi i punës nuk është privilegj partiak. Paga nuk është shpërblim për bindje politike. Askush nuk duhet ta përdorë ekzistencën e një familjeje për të kontrolluar lirinë e një individi”, deklaruan nga VLEN-i.
Sipas përfaqësuesve të partisë, kjo nismë synon t’i japë fund praktikës së mbajtjes së punonjësve në pasiguri dhe varësi nga vullneti i partive politike.
VLEN-i bëri të ditur se angazhimi nuk do të përfundojë me dorëzimin e propozimit, por do të vazhdojë për të siguruar miratimin dhe zbatimin e tij në praktikë.
Në fund, përfaqësuesit e VLEN-it u bënë thirrje deputetëve që ta shqyrtojnë propozimin me përgjegjësi dhe në mënyrë konstruktive, duke vlerësuar se zgjidhja e statusit të punonjësve është e rëndësishme për sigurinë ekonomike të familjeve dhe dinjitetin e punonjësve.
