KE-ja: Nivelet e magazinimit të gazit në BE janë nën mesataren historike
Nivelet e magazinimit të gazit në Bashkimin Evropian janë nën mesataren historike, por blloku aktualisht nuk përballet me një problem sigurie furnizimi pavarësisht perspektivës së një dimri të vështirë, tha sot zëdhënësja e Komisionit Evropian, Anna-Kaisa Itkonen, transmeton Anadolu.
Duke folur në konferencën për mediat, Itkonen tha se BE-ja po monitoron nga afër nivelet e magazinimit të gazit dhe po zhvillon takime koordinimi më të shpeshta me shtetet anëtare për të vlerësuar situatën në të gjithë bllokun.
“Për magazinimin e gazit, jemi më poshtë se mesatarja historike”, tha Itkonen, duke vënë në dukje se çështja u diskutua edhe në Samitin e Këshillit Evropian të javës së kaluar.
“Pavarësisht faktit se po shkojmë drejt një dimri të vështirë, nuk kemi problem sigurie furnizimi, por kriza në Lindjen e Mesme po ndikon në çmimet e energjisë dhe kjo ndikon më pas në nivelet tona të magazinimit të gazit”, tha ajo.
Itkonen tha se BE-ja nuk ka rezerva strategjike gazi të mandatuara ligjërisht, duke ngritur mundësinë e diskutimeve mbi krijimin e rezervave strategjike të gazit. “Kjo është diçka që ne mund të fillojmë të diskutojmë rreth rezervave strategjike të gazit”, tha ajo.
Ndërprerjet në transportin detar përmes Ngushticës së Hormuzit po i ndërlikojnë përpjekjet për të rimbushur inventarët evropianë ndërsa furnizimet e reduktuara të LNG-së nga Lindja e Mesme po e shtrëngojnë tregun global.
