Francë, studentët vazhdojnë bllokadat e shkollave para bisedimeve me zyrtarët e qeverisë

Rreth 200 shkolla të mesme në të gjithë Francën pritet të mbeten të mbyllura sot për shkak të bllokadave të vazhdueshme të studentëve ndërsa qeveria premtoi propozime për të përmirësuar pranimet në universitete, transmeton Anadolu.

Ministri i Arsimit, Edouard Geffray tha për transmetuesin francez BFMTV se “96 për qind e shkollave të mesme janë të hapura”, pa u raportuar ndërprerje në tre të katërtat e departamenteve të vendit, një ditë pas raundit të pestë të protestave mbarëkombëtare.

Disa shkolla mbetën të bllokuara në Paris, përfshirë Voltaire, Helene-Boucher dhe kompleksin shkollor Balzac. Administrata e Balzac-ut pezulloi mësimet me pjesëmarrje fizike, duke përmendur vështirësi në akses dhe shqetësime për sigurinë.

Geffray tha se ministri i Arsimit të Lartë, Philippe Baptiste do t’i paraqesë kryeministrit propozime për të përmirësuar Parcoursup-in, platformën e pranimeve në universitete të Francës, deri në fund të tetorit. Ai shprehu gatishmëri “për rregullime, ndoshta thelbësore”, ndërsa vuri në pikëpyetje se çfarë do ta zëvendësonte platformën nëse ajo do të hiqej.

Sipas Geffray, më pak se 20 për qind e 90 mijë kontributeve të paraqitura në një platformë qeveritare që mbledh ankesat e studentëve kishin të bënin me Parcoursup-in. Ai përjashtoi ndryshimet e menjëhershme në provimin e maturës, provimin e diplomimit në Francë.

“Nuk do ta ndryshoj provimin e maturës gjashtë muaj para zgjedhjeve presidenciale. Duhet të ndalojmë së reformuari vazhdimisht”, tha ai. Përfaqësuesit e studentëve janë planifikuar të takohen me Geffray dhe Baptiste të enjten pasdite ndërsa ata kërkojnë 10 miliardë euro investime.

Presidenti i organizatës “Les Lyceens!”, Pierre Sourzat tha për “Franceinfo” se studentët presin masa konkrete pasi morën “vetëm thërrime”. Edhe pse organizatorët nuk kanë bërë thirrje për një raund të gjashtë protestash të enjten, Unioni i Nxënësve të Shkollave të Mesme u bëri thirrje demonstruesve të mbajnë bllokadat.

Presidenti i Unionit, Ryad Rani dhe përfaqësues të tjerë të studentëve bënë thirrje për pjesëmarrje në një demonstratë të “jelekëve të verdhë” të planifikuar për të shtunën. Ndërkohë, mësimi rifilloi në Shkollën e Mesme “Kleber” në Strasburg, ku javët e fundit ndodhën përleshje midis nxënësve dhe policisë.