MPJ me reagim të ashpër për strehimin e Mihajllovës në Bullgari, do ta njoftojë edhe BE-në

Ministria e Punëve të Jashtme (MPJ) e Maqedonisë së Veriut ka reaguar ndaj pritjes së nivelit të lartë që Bulgaria i bëri Ivës Mihailova në Sofje. Sipas MPJ-së, ky veprim minon përpjekjet për ndërtimin e besimit dhe është në kundërshtim me angazhimet për marrëdhënie të mira fqinjësore.
Ministria thekson se pritja e një personi ndaj të cilit po zhvillohet procedurë gjyqësore dërgon një mesazh të gabuar. Përkatësia kombëtare dhe pasja e një shtetësie tjetër nuk duhet të shërbejnë si mbrojtje nga përgjegjësia para institucioneve kompetente. Ata theksojnë: “Secili ka të drejtë për një gjykim të drejtë. Askush nuk ka të drejtë të përjashtohet nga ligjet.”

Si anëtare e BE-së, nga Bullgaria pritet të respektojë parimet themelore evropiane, duke përfshirë respektimin e procedurave gjyqësore, bashkëpunimin ndërmjet institucioneve dhe barazinë para ligjit. Veprimet që krijojnë përshtypjen e mbrojtjes institucionale nga përgjegjësia gjyqësore janë në kundërshtim me këto parime.

MPJ-ja ka njoftuar se do të informojë partnerët ndërkombëtarë, veçanërisht institucionet e Bashkimit Evropian dhe Këshillin e Evropës, për zhvillimin e këtij rasti. Sipas tyre, veprime të tilla (për të cilat ka pasur edhe shembuj të mëparshëm) dëmtojnë drejtpërdrejt besimin mes dy vendeve dhe ngrenë pyetje rreth respektimit të vlerave të përbashkëta evropiane.

Ministria mbetet e angazhuar për zhvillimin e marrëdhënieve të mira fqinjësore të bazuara në respekt të ndërsjellë, besim dhe parime evropiane, dhe pret që edhe pala bullgare të tregojë të njëjtën përgjegjësi. “Respektimi i drejtësisë nuk është çështje e zgjedhjes politike, por detyrim themelor evropian,” thuhet në deklaratën e MPJ-së.