Nga 1 tetori sistem i ri për drejtorët: Kufizohen funksionet e ushtruesve të detyrës, vendosen rregulla të reja për zgjedhjen
Nga 1 tetori fillon zbatimi i Ligjit të ri për Shërbimin e Lartë Drejtues, me të cilin vendosen rregulla të reja për zgjedhjen e drejtorëve dhe pozitave të tjera të larta drejtuese në sektorin publik. Ligji përfshin rreth 100 institucione dhe synon të vendosë një sistem të bazuar në meritë gjatë përzgjedhjes së drejtuesve.
Ministri i Administratës Publike, Goran Minçev, thotë se një nga qëllimet kryesore është kufizimi i praktikës së deritanishme të drejtimit afatgjatë të institucioneve përmes ushtruesve të detyrës.
Sipas rregullave të reja, funksionet e ushtruesve të detyrës do të rregullohen në mënyrë strikte, ndërsa përzgjedhja e drejtuesve do të bëhet sipas kritereve dhe procedurave të përcaktuara paraprakisht.
Kandidatët për pozitat drejtuese do t’i nënshtrohen një procedure përzgjedhjeje, ndërsa reforma përfshin drejtorët, zëvendësdrejtorët, sekretarët shtetërorë dhe anëtarët e bordeve drejtuese.
Sipas zgjidhjes së paralajmëruar, bordet drejtuese do të racionalizohen dhe do të kenë maksimumi tre anëtarë.
Minçev e paraqet reformën si një hap drejt profesionalizimit dhe reduktimit të ndikimit partiak në administratë. Megjithatë, një pjesë e organizatave të shoqërisë civile më herët kanë dhënë vlerësime të kundërta dhe kanë paralajmëruar se modeli i propozuar nuk garanton depolitizim të plotë.
E rëndësishme është se rregullat e reja nuk do t’i ndërpresin automatikisht të gjitha mandatet ekzistuese. Minçev ka sqaruar më herët se drejtuesit e emëruar para fillimit të zbatimit të ligjit do të vazhdojnë të ushtrojnë funksionet deri në përfundimin e mandatit të tyre aktual.
